Other News
ឯកឧត្ដមរដ្ឋលេខាធិការ តូច ប៊ុនហួរ និងឯកឧត្តមបណ្ឌិត យ៉ង សាំង កុមារ អញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលដល់មន្រ្តីកសិកម្មឃុំស្ដីពី «ការត្រៀមបង្ការគ្រោះមហន្តរាយក្នុងវិស័យកសិកម្ម»
ចេញផ្សាយ ១៥ កញ្ញា ២០២៥ 986
នៅថ្ងៃទី១៥ ខែកញ្ញា ឆ្នាំ២០២៥ ឯកឧត្ដម តូច ប៊ុនហួរ រួមជាមួយឯកឧត្តមបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងពិធីបើកវគ្គបណ្ដុះបណ្ដាលដល់មន្ត្រីកសិកម្មឃុំ ស្ដីពី «ការគ្រប់គ្រងគ្រោះមហន្តរាយក្នុងវិស័យកសិកម្ម» និងការចូលរួមពីលោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ មន្ត្រីរាជការ ព្រមទាំងមន្ត្រីកសិកម្មឃុំ សរុប៨២នាក់ ដែលធ្វើឡើងនៅមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ។
នាឱកាសនោះ ឯកឧត្តម តូច ប៊ុនហួរ បានគូសបញ្ជាក់ថា វគ្គបណ្ដុះបណ្ដាលរៀបចំឡើងក្នុងគោលបំណងពង្រឹងសមត្ថភាព និងតួនាទីរបស់មន្ត្រីកសិកម្មឃុំ លើការត្រៀមបង្ការ តាមដាន ប្រមូលទិន្នន័យ និងរាយការណ៍ពីគ្រោះមហន្តរាយនៅក្នុងឃុំគោលដៅ ជាពិសេស គឺផ្ដោតលើការកសាងសមត្ថភាពលើការគាំទ្រដល់កសិករក្នុងការត្រៀមបង្ការ និងបន្ធូរបន្ថយគ្រោះមហន្តរាយលើវិស័យកសិកម្ម។
ឯកឧត្តម តូច ប៊ុនហួរ ក៏បានណែនាំដល់មន្រ្តីកសិកម្មឃុំឱ្យយកចិត្តទុកដាក់ តាមដានជាប្រចាំនូវសភាពការណ៍ពាក់ព័ន្ធនឹងគ្រោះមហន្តរាយ ទឹកជំនន់ រាំងស្ងួត ជំងឺសត្វ សត្វល្អិតបំផ្លាញដំណាំ និងតម្លៃកសិផល ជាពិសេសរាយការណ៍បញ្ហាប្រឈមនានាឱ្យបានទាន់ពេលវេលា សំដៅពង្រឹងអន្តរាគមន៍ជួយដោះស្រាយភាពចាំបាច់ឱ្យកាន់តែមានប្រសិទ្ធភាព និងប្រសិទ្ធផលខ្ពស់។
សូមជម្រាបថា វគ្គបណ្ដុះបណ្ដាលស្ដីពី«ការត្រៀមបង្ការគ្រោះមហន្តរាយក្នុងវិស័យកសិកម្ម» នេះទទួលបានការសហការឧបត្ថម្ភពីអង្គការស្បៀង និងកសិកម្មសហប្រជាជាតិ (FAO)ដែលបានរៀបចំឡើងចំនួន៣លើករួចហើយ នឹងគ្រោងបន្តរៀបចំសម្រាប់មន្រ្តីកសិកម្មទូទាំងប្រទេសចំនួន ១២២៨ រូប ក្នុង២៤ខេត្ត នាពេលខាងមុខ៕
