ឯកឧត្តមរដ្ឋមន្ត្រី និងសហការីបានចុះពិនិត្យវឌ្ឍនភាពដំណាំកប្បាសដែលក្រុមហ៊ុន Jiangsu Lianfa Group Co., Ltd

ចេញ​ផ្សាយ​ ២២ កក្កដា ២០១៩ 4202

បន្ទាប់ពីពិនិត្យចំការបន្លែសុវត្ថិភាពនៅភូមិអូរថ្កូវ សង្កាត់រលា ក្រុងពោធិ៍សាត់រួច និងដើម្បីផ្សាភ្ជាប់ទៅនឹងបទយកការណ៍ដែលបានចុះផ្សាយកាលពីថ្ងៃសុក្រ ទី១៩ ខែកក្កដា ឆ្នាំ២០១៩ នៅលើគេហទំព័ររបស់ស្ថានីយទូរទស្សន៍ CNC ឯកឧត្តមរដ្ឋមន្ត្រី និងសហការីបានចុះពិនិត្យវឌ្ឍនភាពដំណាំកប្បាសដែលក្រុមហ៊ុន Jiangsu Lianfa Group Co., Ltd បាននិងកំពុងសម្រេចបានពីការពិសោធន៍សាកល្បងដាំដុះមុនបោះទុនវិនិយោគសាងសង់រោងចក្រកែច្នៃកប្បាស ទៅជាក្រណាត់សម្រាប់ផ្គត់ផ្គង់ដល់បណ្តារោងចក្រកាត់ដេរសម្លៀកបំពាក់ទាំងក្នុងព្រះរាជជាណាចក្រកម្ពុជា និងនាំចេញនាថ្ងៃអនាគត ដែលការសាកល្បងដាំដុះនេះស្ថិតនៅស្រុកបាកាន ខេត្តពោធិ៍សាត់។

តាមការរាយការណ៍របស់តំណាងក្រុមហ៊ុនបានឲ្យដឹងថា បច្ចុប្បន្នក្រុមហ៊ុនកំពុងធ្វើការសាកល្បងពូជកប្បាសចំនួន ៤៤ពូជ ទាំងពូជក្នុងស្រុក និងក្រៅស្រុក។ ហើយអ្វីដែលគួរឲ្យកត់សម្គាល់នោះ ទាំង ៤៤ពូជ គឺមានការរីកលូតលាស់យ៉ាងល្អប្រសើរ រីឯគុណភាព និងទិន្នផលនៃកប្បាសបានឆ្លើយតបដូចការរំពឹងទុករបស់ក្រុមហ៊ុន។ លទ្ធផលនេះបានផ្តល់ក្តីសង្ឃឹមយ៉ាងមុតមាំដល់ក្រុមហ៊ុនក្នុងការបន្តពង្រីកការដាំដុះថែមទៀតនៅលើផ្ទៃដីជាង ១៨០ហត ដែលបាននិងកំពុងរៀបចំហេដ្ឋារចនាសម្ព័ន្ធគាំទ្រ។

នាឱកាសនេះ ឯកឧត្តមរដ្ឋមន្ត្រីបានសម្តែងនូវសេចក្តីរីករាយ និងកោតសរសើរចំពោះលទ្ធផលដែលក្រុមហ៊ុនសម្រេចបាន ហើយលោកគាំទ្រ និងលើកទឹកចិត្តចំពោះផែនការវិនិយោគបន្តរបស់ក្រុមហ៊ុន។ ដើម្បីឲ្យផែនការវិនិយោគនេះទទួលបានជោគជ័យ ឯកឧត្តមរដ្ឋមន្ត្រីក៏បានបញ្ជាក់ផងដែរថា មន្ត្រីជំនាញនៃក្រសួងកសិកម្ម រុក្ខាប្រមាញ់ និងនេសាទ និងមន្ទីរខេត្តនឹងផ្តល់កិច្ចសហការឲ្យអស់លទ្ធភាព។