ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម បានដឹកនាំគណៈប្រតិភូទៅបំពេញទស្សនកិច្ចនៅខេត្តហៃណាន នៃសាធារណៈរដ្ឋប្រជាមានិតចិន ដើម្បីជួបពិភាក្សាជាមួយស្ថាប័នពាក់ព័ន្ធ ផ្លាស់ប្តូរបទពិសោធន៍ការងារទាក់ទងនឹងវិស័យកសិកម្ម

ចេញ​ផ្សាយ​ ២៨ មីនា ២០២៤ 3675

ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំគណៈប្រតិភូទៅបំពេញ ទស្សនកិច្ចនៅខេត្តហៃណាន នៃសាធារណៈរដ្ឋប្រជាមានិតចិន រយៈពេល៤ថ្ងៃ ចាប់ពីថ្ងៃទី២២ ដល់ ២៥ ខែមីនា ឆ្នាំ២០២៤ ដើម្បីជួបពិភាក្សាផ្លាស់ប្តូរបទពិសោធន៍ជាមួយលោក Fu Xuanguo ប្រធានក្រុមប្រឹក្សាសាកលវិទ្យាល័យហៃណាន ពាក់ព័ន្ធនឹងវិស័យកសិកម្ម។

ក្នុងដំណើរទស្សនកិច្ចនេះ ឯកឧត្តមបានជួបពិភាក្សា ផ្លាស់ប្តូរបទពិសោធន៍ ជាមួយលោក Fu Xuanguo ប្រធានក្រុមប្រឹក្សាសាកលវិទ្យាល័យហៃណាន អំពី GIS និងRemote sensing លើការប្រើប្រាស់បច្ចេកវិទ្យា ផ្កាយរណបសម្រាប់តាមដាន និងវាយតម្លៃបម្រែបម្រួលការប្រើប្រាស់ដីកសិកម្ម ការរៀបចំប្រព័ន្ធគ្រប់គ្រងព័ត៌មានធនធានដីកសិកម្ម  រួមទាំងទស្សនកិច្ចសិក្សាអំពីការផលិត និងការទុកដាក់ជីនិងថ្នាំកសិកម្ម។ 

ឯកឧត្តមបន្ថែមថា ក្រុមការងារក៏បានទៅទស្សនកិច្ចនៅCHANGMAI YONGFA center of the Hainan Academy of Agricultural Sciences និងទស្ស្សនកិច្ចនៅ LEDONG LIGUO center of the Hainan Academy of Agricultural Sciences ដោយបានជួបពិភាក្សា ស្តីពីកិច្ចសហប្រតិបត្តិការ នឹងស្នើសុំការគាំទ្រផ្នែកបច្ចេកទេស លើការអភិវឌ្ឍជំនាញមួយចំនួនរួមមាន បច្ចេកទេសកែលម្អដីកសិកម្មសម្រាប់ការដាំដុះដំណាំរួមផ្សំ(ពពួកសណ្ដែក) បន្ទាប់ពីប្រមូលផលស្រូវវស្សា បច្ចេកទេសគ្រប់គ្រងកាកសំណល់ដំណាំដោយមិនដុតបំផ្លាញ (ស្រូវ ពោត ដំឡូងមី អំពៅ) សម្រាប់ផលិតជីសរីរាង្គប្រើប្រាស់ក្នុងផលិតកម្មកសិកម្មប្រទេសកម្ពុជា និងបច្ចេកទេសផលិតនិងប្រើប្រាស់ជីជីវសាស្ត្រ (Rhizobial inoculants) សម្រាប់ផលិតកម្មដំណាំពពួកសណ្ដែក។

ឯកឧត្តមបញ្ជាក់ថា ចំពោះដំណើរទស្សនកិច្ចនៅ SANYA YAZHOU BAY Science and Technology City និយាយអំពីការគ្រប់គ្រងព័ត៌មានដីកសិកម្មដោយប្រើប្រាស់ប្រព័ន្ធព័ត៌មានឌីជីថល (Land Information Management Platform) នឹងបានជួបពិភាក្សាផ្លាស់ប្តូរបទពិសោធន៍ អំពីការគ្រប់គ្រងដីកសិកម្ម និងការអភិវឌ្ឍប្រព័ន្ធនេះ សម្រាប់គ្រប់គ្រងធនធានដីកសិកម្មក្នុងប្រទេសកម្ពុជា។ មិនត្រឹមតែប៉ុណ្ណោះ ក្រុមការងារក៏បានទៅទស្សនកិច្ចស្ថានីយ៍ Sanya និងHaikok ហើយភាគីកម្ពុជាក៏បាន ស្នើសុំឱ្យភាគីចិនយកប្រភេទពូជដំណាំទំពាំងបាយជូរតំបន់ត្រូពិកមកសាកល្បងក្នុងប្រទេសកម្ពុជាបន្ថែមលើប្រភេទពូជសណ្ដែកបារាំង (Guar bean) និងប្រភេទពូជស្រូវ Japonica ទំពាំងបាយជូរ និងបន្លែគ្រប់មុខ៕