Other News
ឯកឧត្តមរដ្ឋមន្ត្រី ឌិត ទីណា និងសហការីក្រុមការងារផលិតពូជស្រូវ នៃក្រសួងកសិកម្ម រុក្ខាប្រមាញ់ និងនេសាទ បានចុះទៅកាន់ខេត្តកំពង់ធំ និងខេត្តសៀមរាប
ចេញផ្សាយ ២៦ ធ្នូ ២០២២ 4824
ឯកឧត្តម ឌិត ទីណា និងសហការីក្រុមការងារផលិតពូជស្រូវ នៃក្រសួងកសិកម្ម រុក្ខាប្រមាញ់ និងនេសាទ បានចុះទៅកាន់ខេត្តកំពង់ធំ និងខេត្តសៀមរាប ចាប់ពីថ្ងៃទី២១ ដល់ថ្ងៃទី២២ ខែធ្នូ ឆ្នាំ២០២២ ដើម្បីពិនិត្យមើលអំពីវឌ្ឍភាពនៃការផលិតពូជស្រូវដែលមានគុណភាពល្អសម្រាប់ផ្គត់ផ្គង់ដល់ប្រជាកសិករនារដូវដាំដុះខាងមុខ។ នៅខេត្តកំពង់ធំ ឯកឧត្តមរដ្ឋមន្ត្រី បានពិនិត្យមើលការប្រមូលផលស្រូវ Japonica Rice នៅភូមិខ្វែក ឃុំកំពង់ថ្ម ស្រុកសន្ទុក ហើយបានបន្តដំណើរទៅកាន់ក្រុមហ៊ុន BRM ដើម្បីពិនិត្យរោងម៉ាស៊ីនកិនស្រូវ និងឡសម្ងួតគ្រាប់ពូជ ក៏ដូចជាពិនិត្យតំបន់ដាំដុះស្រូវផលិតគ្រាប់ពូជរបស់ក្រុមហ៊ុន BRM ផងដែរ។ បេសកកម្មនាថ្ងៃបន្ទាប់នៅខេត្តសៀមរាប ឯកឧត្តមបានចុះពិនិត្យទីតាំងបណ្ដុះពូជស្រូវនៅស្រុកពួក ដែលផលិតគ្រាប់ពូជស្រូវសែនក្រអូប០១ ចំណាត់ថ្នាក់ចុះបញ្ជី និងផលិតកម្មគ្រាប់ពូជវិញ្ញាបនបត្រ ប្រភេទសែនក្រអូប០១។ ក្នុងអំឡុងពេលចុះពិនិត្យនេះ ឯកឧត្តមរដ្ឋមន្ត្រីបានបញ្ជាក់ប្រាប់ដល់បងប្អូនប្រជាកសិករ និងតំណាងក្រុមហ៊ុន រោងម៉ាស៊ីនកិនស្រូវថា ការងារចំពោះមុខនេះ គឺការផលិតពូជស្រូវ និងការរៀបចំទីផ្សារសម្រាប់កសិករនារដូវប្រមូលផលក្រោយៗ។ ក្រុមការងារជំនាញនៃក្រសួងកសិកម្មកំពុងតែចងក្រងកសិករសម្រាប់ការផលិតពូជ ហើយផ្សារភ្ជាប់ជាមួយនឹងរោងម៉ាស៊ីនកិនស្រូវដែលនឹងទទួលយកពូជស្រូវនេះទៅផ្គត់ផ្គង់ដល់ប្រជាកសិករក្នុងតម្លៃសមរម្យ ក្នុងគោលដៅកាត់បន្ថយការចំណាយរបស់កសិករ។ ការចងក្រងនេះធ្វើឡើងក្នុងគោលដៅធានាទីផ្សារសម្រាប់បងប្អូនប្រជាកសិករចាប់តាំងពីពួកគាត់ទទួលពូជស្រូវសុទ្ធយកទៅបង្កបង្កើនផល និងដើម្បីបំពេញតម្រូវការរបស់រោងម៉ាស៊ីនកិនស្រូវ។ ប្រសិនបើអនុវត្តបាននោះបញ្ហាស្រូវធ្លាក់ថ្លៃនារដូវប្រមូលផលនឹងលែងកើតឡើងដូចមុនទៀតហើយ៕
