ឯកឧត្តមរដ្ឋលេខាធិការ ហាស់ សារ៉េត អញ្ជើញដឹកនាំកិច្ចប្រជុំលើកទី៣ នៃ​គណៈ​កម្មការតម្រង់ទិសគម្រោងជលផលសមុទ្រ និងតំបន់ឆ្នេរប្រកបដោយ​ចីរភាព

ចេញ​ផ្សាយ​ ២៧ កញ្ញា ២០២៥ 702

នៅថ្ងៃទី២៦ ខែកញ្ញា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការ​ក្រសួងកសិកម្ម រុក្ខាប្រមាញ់ និងនេសាទ និងជាសហប្រធាន​គណៈកម្មការ​តម្រង់ទិស បានដឹកនាំកិច្ចប្រជុំលើកទី៣ របស់គណៈកម្មការតម្រង់ទិស​នៃគម្រោងជលផលសមុទ្រ និងតំបន់ឆ្នេរប្រកបដោយចីរភាព ក្រោមក្រប​ខណ្ឌ​​ហិរញ្ញប្បទានរបស់ធនាគារអភិវឌ្ឍន៍អាស៊ី (ADB) និងទីភ្នាក់ងារបារាំង​សម្រាប់ការអភិវឌ្ឍ (AFD)។
កិច្ចប្រជុំធ្វើឡើងនៅសាលប្រជុំរដ្ឋបាលជលផល មានការអញ្ជើញ​ចូល​រួម​ពីសមាជិក សមាជិកា ជាតំណាងក្រសួងស្ថាប័នពាក់ព័ន្ធថ្នាក់ជាតិ និងថ្នាក់​ខេត្ត រួមមាន៖ ក្រសួងសេដ្ឋកិច្ច និងហិញ្ញវត្ថុ រដ្ឋបាលជលផល ក្រសួងបរិស្ថាន សហគ្រិនខ្មែរ ក្រសួងសាធារណការ និងដឹកជញ្ជូន ក្រសួងរៀបចំដែនដី​នគរូប​នីយកម្ម និងសំណង់ ក្រសួងឧស្សាហកម្ម វិទ្យសាស្ត្រ បច្ចេកវិទ្យា និង​នវានុវត្តន៍ ក្រសួងពាណិជ្ជកម្ម អភិបាលរង​នៃខេត្តតំបន់ឆ្នេរទាំង៤​ជា​នាយក​គម្រោងថ្នាក់ខេត្ត និងក្រុមការងារ​អនុវត្តគម្រោង។ 
គោលបំណងនៃកិច្ចប្រជុំ គឺដើម្បីពិនិត្យវឌ្ឍនភាពនៃការអនុវត្តន៍គម្រោង មកទល់ត្រីមាសទី៣ ឆ្នាំ២០២៥ និងពិនិត្យមើលលើផែនការសកម្មភាព​ឆ្នាំ២០២៦ ដោយមានការសម្របសម្រួលតម្រង់ទិសគម្រោង លើការ​វិនិយោគ​​ដែលពាក់ព័ន្ធជាមួយគម្រោងអភិវឌ្ឍន៍ផ្សេងទៀតនៅតំបន់ឆ្នេរ។
នាកិច្ចប្រជុំនោះ ឯកឧត្តមរដ្ឋលេខាធិការ ហាស់ សារ៉េត បានផ្តល់អនុសាសន៍​ដល់ក្រុមការងារគម្រោងឱ្យបន្តយកចិត្តទុកដាក់អនុវត្តគម្រោង និងប្រែក្លាយ​មតិយោបល់​របស់គណៈកម្មការតម្រង់ទិសជាសកម្មភាពជាក់ស្តែង ដើម្បីឱ្យ​គម្រោង​សម្រេចលទ្ធផលតាមការរំពឹងទុក ក្នុងការអភិវឌ្ឍវិស័យជលផល​សមុទ្រប្រកបដោយនិរន្តភាព។
ជាលទ្ធផល គណៈកម្មការនៃកិច្ចប្រជុំទាំងអស់បានពិនិត្យឃើញថា ក្រុម​ការងារ​បានពន្លឿនការងារអនុវត្តន៍គម្រោងក្នុងឆ្នាំ២០២៥នេះ ដោយបាន​ជំរុញ​ការដាក់ពង្រាយសំណង់ជម្រកត្រីសិប្បនិម្មិត ក្នុងការបង្កើនផល​ស្តុក​មច្ឆជាតិ ការធ្វើវារីវប្បកម្មក្នុងសមុទ្រដោយមិនប្រើចំណី ការលើកកម្ពស់​សមត្ថភាព​គ្រប់គ្រង និងសកម្មភាពសេដ្ឋកិច្ចរបស់សហគមន៍នេសាទ ការ​សាង​សង់​អគារការិយាល័យខណ្ឌរដ្ឋបាលជលផល ការរៀបចំអភិវឌ្ឍ​ផែ​នេសាទ និងការជំរុញការអភិវឌ្ឍខ្សែច្រវាក់តម្លៃផលិតផលជលផលសមុទ្រ ព្រម​ទាំងការពង្រឹងតួនាទីស្រ្តីក្នុងសហគ្រិនភាព និងយេនឌ័រផងដែរ៕