ឯកឧត្តមរដ្ឋលេខាធិការ ហាស់ សារ៉េត និងលោក ឃុន អេវើរ៉ាត អនុប្រធានផ្នែក​សហប្រតិបត្តិការនៃសហភាពអឺរ៉ុប អញ្ជើញដឹកនាំកិច្ចប្រជុំគណៈកម្មការតម្រង់ទិស កម្មវិធីជំរុញកំណើនវិស័យជលផលប្រកបដោយចីរភាពនិងបរិយាបន្ន៖ ផ្នែកជលផល (CaPFish Capture) លើកទី៩

ចេញ​ផ្សាយ​ ២០ មិថុនា ២០២៥ 866

នៅព្រឹកថ្ងៃទី១៩ ខែមិថុនា ឆ្នាំ២០២៥ ឯកឧត្តម ហាស់ សារ៉េត រដ្ឋលេខាធិការក្រសួង​កសិកម្ម រុក្ខាប្រមាញ់ និងនេសាទ និងលោក ឃុន អេវើរ៉ាត អនុប្រធានផ្នែកសហ​ប្រតិបត្តិការ នៃសហភាពអឺរ៉ុប ដែលជាសហប្រធានបានដឹកនាំកិច្ច​ប្រជុំគណៈកម្មកា​រ​តម្រង់ទិស កម្មវិធីជំរុញកំណើនវិស័យជលផលប្រកបដោយចីរភាពនិងបរិយាបន្ន៖ ផ្នែកជលផល (CaPFish Capture) លើកទី៩ ធ្វើនៅសណ្ឋាគារ កាំបូឌីយ៉ាណា ដែលមាន​អ្នកចូលរួមចំនួន ៥១នាក់ មកពីរដ្ឋបាលជលផល តំណាងស្ថានទូត​សហភាព​​អឺរ៉ុប ក្រសួងពាក់ព័ន្ធ និងបណ្ដាអង្គការពាក់ព័ន្ធនានា ។

កិច្ចប្រជុំនេះធ្វើឡើងក្នុងគោលបំណង ផ្ដោតសំខាន់ទៅលើការត្រួត​ពិនិត្យ​លទ្ធផល​សម្រេចបាន និងសកម្មភាព ដែលបាននិងកំពុងអនុវត្តសកម្មភាព​រហូត​មកដល់ពាក់​កណ្ដាលឆ្នាំ២០២៥នេះ។ ភាគីពាក់ព័ន្ធក្នុងកិច្ចប្រជុំ​បានធ្វើ​បទបង្ហាញ ស្ដីអំពីសមិទ្ធ​ផល​សកម្មភាពបានអនុវត្ត  ផែនការសកម្មភាពដែលត្រូវអនុវត្តបន្ត និងបញ្ហាប្រឈម​នានា ដែលត្រូវ​លើកយកមកពិភាក្សារកដំណោះស្រាយ ដើម្បីជំរុញឱ្យគម្រោង​ដំណើរការ​ដោយរលូន និងទទួលបានជោគជ័យ។

បន្ទាប់ពីបានស្ដាប់បទបង្ហាញ ឯកឧត្តមហាស់ សារ៉េត បានសម្តែងការអបអរសាទរ និងកោតសរសើរចំពោះសមិទ្ធផល និងលទ្ធផលការងារដែលទទួលបានជោគជ័យ។ ឯកឧត្តម ក៏បានលើកអនុសាសន៍ល្អៗមួយចំនួនជួយតម្រង់ទិស ៖ ១.ស្នើឱ្យក្រុម​ការងារ​ទាំងអស់យកចិត្តទុកដាក់ជួយថែរក្សា ការពារអភិរក្សគ្រប់គ្រងធនធាន​ជលផលឱ្យបានគង់វង្សយូរអង្វែង ២.ណែនាំឱ្យក្រុមការងារគម្រោងកំណត់ពី​បញ្ហា​ប្រឈមដែលរារាំងដល់ការអនុវត្តន៍គម្រោង ដើម្បីឱ្យគណៈកម្មការតម្រង់ទិស ពិភាក្សានិងរកដំណោះស្រាយ ៣.ត្រូវយកចិត្តទុកដាក់សហការអនុវត្ត​សកម្មភាព​ណាចាំបាច់ និងការងារណាដែលនៅសេសសល់ និងដោះស្រាយបញ្ហា​ដែលកំពុង​រាំងស្ទះឬយឺតយ៉ាវ ៤.បង្កើនសមត្ថភាពតាមរយៈការបណ្ដុះបណ្ដាល​ធនធានមនុស្ស ៥.ត្រូវរៀបចំសរសេររបាយការណ៍បូកសរុប ដើម្បីបញ្ចប់គម្រោង ដែលបាន​អនុវត្ត​រយៈពេល៦ឆ្នាំកន្លងមកនេះ។

ជាទីបញ្ចប់ ឯកឧត្តមរដ្ឋលេខាធិការ ក៏បានថ្លែងអំណរគុណយ៉ាងជ្រាលជ្រៅ​ដល់សហភាព​អឺរ៉ុប ដែលបានជួយគាំទ្រថវិកា និងក្រសួងហិរញ្ញវត្ថុដែលបាន​ជួយសម្របសម្រួលការងារ សម្រាប់អនុវត្តកម្មវិធី CaPFish Capture ដើម្បីជួយអភិវឌ្ឍ អភិរក្ស គ្រប់គ្រង និងប្រើប្រាស់ធនធានជលផល​ប្រកបដោយនិរន្តភាព និងជួយលើកកម្ពស់សេដ្ឋកិច្ចជាតិ៕