ឯកឧត្តមរដ្ឋលេខាធិការ ចាន់ សុវុឌ្ឍ អញ្ជើញចុះពិនិត្យត្រៀមលក្ខណៈទប់ស្កាត់ការធ្លាក់ចុះតម្លៃស្រូវ និងពិនិត្យមើលស្ថានភាពស្រូវ នៅខេត្តបាត់ដំបង

ចេញ​ផ្សាយ​ ១៦ មករា ២០២៥ 2104

នាព្រឹកថ្ងៃទី១៥ ខែមករា​ ឆ្នាំ២០២៥​ ឯកឧត្តម ចាន់ សុវុឌ្ឍ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណេីរដោយលោក អុិន សុវណ្ណមុន្នី អនុប្រធានមន្ទីរកសិកម្ម រុក្ខាប្រមាញ់ និងនេសាទ និងសហការី បានអញ្ជើញចុះពិនិត្យត្រៀមលក្ខណៈទប់ស្កាត់ការធ្លាក់ចុះតម្លៃស្រូវ និងពិនិត្យមើលស្ថានភាពស្រូវ នៅស្រុកសង្កែ ស្រុកគាស់ក្រឡ ស្រុកមោងឫស្សី និងស្រុករុក្ខគីរី ខេត្តបាត់ដំបង។

ក្នុងដំណើរចុះត្រួតពិនិត្យនេះ ឯកឧត្តមរដ្ឋលេខាធិការ បានលើកទឹកចិត្តឲ្យប្រជាកសិករធ្វើការជជែក និងរាយការណ៍មកអាជ្ញាធរពាក់ព័ន្ធ មន្រ្តីកសិកម្មឃុំ និងមន្ទីរកសិកម្មខេត្តដើម្បីជួយសម្របសម្រួលពេលជួបប្រទះបញ្ហា ជៀសជាងការធ្វើសកម្មភាពនានាដែលនាំឲ្យមានភាពអសន្តិសុខសង្គម និងប៉ះពាល់ដល់ផលប្រយោជន៍អ្នកដទៃ។ ឯកឧត្តមរដ្ឋលេខាធិការ បានគូសបញ្ជាក់ថាមន្ទីរកសិកម្មត្រូវរៀបចំស្រែបង្ហាញ និងធ្វើការពិសោធន៍ប្រៀបធៀបពូជស្រូវក្នុងស្រុក និងពូជស្រូវនាំចូលពីបរទេសដូចជាពូជស្រូវ អូអឹម៥៤៥១ ជាដើមដើម្បីធ្វើការបង្ហាញដល់កសិករក្នុងស្រុកទាំង០៤​ នៃខេត្តបាត់ដំបង យល់ដឹងកាន់តែច្បាស់ និងផលប្រយោជន៍នៃការជំរុញការដាំពូជក្នុងស្រុក។

ជាមួយគ្នានេះ ឯកឧត្តមរដ្ឋលេខាធិការ បានណែនាំដល់មន្ទីរកសិកម្មខេត្តដើម្បីផ្តល់វគ្គបណ្តុះបណ្តាលពីការគ្រប់គ្រងកត្តាចង្រៃ ជម្ងឺ និងសត្វល្អិតលើស្រូវដល់ប្រជាកសិករ និងពិនិត្យមើលលទ្ធភាពនៃការកសាងសហគមន៍កសិកម្មទំនើប ដែលផ្តល់ផលចំនេញជាច្រើនដល់ប្រជាកសិករតាមរយៈការកាត់បន្ថយថ្លៃដើមផលិត មានផែនការផលិតកម្មរួមគ្នា មានធនធានមនុស្ស មានកិច្ចសន្យាផលិតកម្មច្បាស់លាស់ ផ្គត់ផ្គង់ទៅតាមតម្រូវការទីផ្សារ ទទួលបានកម្ចីការប្រាក់ទាប ទទួលបានជំនួយបច្ចេកទេសពីក្រសួងកសិកម្ម និងហានិភ័យទាបពីការប្រែប្រួលអាកាសធាតុ។

ជាទីបញ្ចប់ ឯកឧត្តមរដ្ឋលេខាធិការ បានផ្តល់អនុសាសន៍ណែនាំឲ្យមានការជំរុញផលិតកម្មតាមកិច្ចសន្យារវាងអ្នកផលិតស្រូវ និងវិស័យឯកជន ក្នុងករណីដែលឈ្មួញផ្អាកការទិញក្នុងកំឡុងពេលចូលឆ្នាំចិន-វៀតណាម ប្រជាកសិករមានមធ្យោបាយអាចរក្សាទុកស្រូវក្នុងស្រែសិន រឺអាចហាលសម្ងួតរក្សាទុកឲ្យបានត្រឹមត្រូវ ហើយអាជ្ញាធរមូលដ្ឋានត្រូវសហការផ្តល់ព័ត៌មាន និងទំនាក់ទំនងទៅកាន់ក្រសួងកសិកម្ម ដើម្បីសម្របសម្រួលជាមួយរោងម៉ាស៊ីនដើម្បីចុះជួយប្រមូលទិញ៕