ព័ត៌មានផ្សេងៗទៀត
ធ្វើស្រូវបើចង់ចំណេញច្រើនត្រូវតែប្រើប្រាស់បច្ចេកទេសថ្មី
ចេញផ្សាយ ១៥ មករា ២០១៨ 5784
មន្ត្រីជាន់ខ្ពស់ក្រសួងកសិកម្មបានប្រាប់ដល់កសិករដែលកំពុងធ្វើស្រែប្រាំងនៅភូមិផ្សារ ឃុំភ្នំដិន ស្រុកគិរីវង្សថា បើធើ្វស្រែចង់ចំណេញបានច្រើននោះ ត្រូវតែផ្លាស់ប្ដូរបច្ចេកទេសថ្មី ទើបអាចទទួលបានចំណូលច្រើនពីការធើ្វកសិកម្មនេះ ។
នៅចំពោះមុខកសិករធ្វើស្រែប្រាំងចំនួនជិត ១០០នាក់ លោក ច័ន្ទ សារុន រដ្ឋមន្ត្រីក្រសួងកសិកម្មបានមានប្រសាសន៍ថា អ្វីដែលលោកចង់ឃើញចង់ បានក៏ដូចជាប្រមុខរាជរដ្ឋាភិបាលដែរ គឺចង់ឃើញកសិករធ្វើស្រែដោយទទួលបានផលល្អ ទិន្នផលកើនឡើងពោលគឺធ្វើស្រែដោយបានចំណេញ។ លោកបាន បន្តថា ប៉ុនែ្តបើកសិករនៅធ្វើរបៀបចាស់ នៅក្នុងការធ្វើកសិកម្មបែបនេះគឺមិនអាចចំណេញបានទេ។
លោករដ្ឋមន្ត្រី និងសហការីបានអញ្ជើញទៅទីនោះកាលពីចុងសប្តាហ៍កន្លងទៅនេះ ដើម្បីពិនិត្យមើលការធ្វើស្រែ។តាមរយៈនៃការពិនិត្យមើល និងស្ដាប់ការលើកឡើងរបស់កសិករ គឺឃើញថាកសិករនៅប្រើរបៀបចាស់ក្នុងការធើ្វស្រែនេះដោយពួកគតាត់ចំណាយពូជក៏ច្រើន ពូជមិនសុទ្ធល្អ ប្រើជីគីមី និងថ្នាំពុលកសិកម្មច្រើននៅឡើយ។
នៅទីនោះ កសិករប្រើពូជរហូត ២០០គីឡូក្រាមក្នុង១ហិកតា។ លោករដ្ឋមន្ត្រីបានមានប្រសាសន៍ថា ដើម្បីធ្វើស្រែបានចំណេញកសិករត្រូវតែពិចារណាទៅលើការផ្លាស់ប្ដូរមួយចំនួន។ បន្ថយការប្រើពូជតាម រយៈការប្រើឧបករណ៍ព្រោះស្រូវប្រភេទថ្មីដែលអាចកាត់បន្ថយបានពី ២០០គីឡូក្រាម មកនៅត្រឹម ៧០គីឡូក្រាម។ ប្រើឧបករណ៍អូសកម្ចាត់ស្មៅ ដោយមិនចាំ បាច់ប្រើថ្នាំពុលសំលាប់ស្មៅទេ ព្រោះដីនេះមានជាតិជូរសម្បូរជាតិដែក។ មុននឹងប្រើជីគីមី ឬថ្នាំពុលកសិកម្ម ត្រូវពិភាក្សាជាមួយអ្នកជំនាញសិន។ នៅក្នុងជំនួបនេះលោករដ្ឋមន្ត្រីក៏បានអនុញ្ញាតឲអ្នកជំនាញធ្វើការពន្យល់ដល់កសិករ អំពីបច្ចេកទេសដាំដុះមួយផងដែរ។
