ឯកឧត្តម ឡឹក សុធារ អនុរដ្ឋលេខាធិការ ក្រសួងកសិកម្ម អញ្ជើញចូលរួមជាវាគ្មិនក្នុងកម្មវិធីសន្ទនាមតិ «ជីវិតយើង សង្គមយើង» ដែលពិភាក្សាលើប្រធានបទស្ដីពី «ការផ្តល់ព័ត៌មានអំពីផលិតផលរបស់កសិករទៅមន្ត្រីកសិកម្ម»

ចេញ​ផ្សាយ​ ១៣ មីនា ២០២៤ 2982

នៅថ្ងៃ១២ ខែមីនា ឆ្នាំ២០២៤ វេលាម៉ោង១១:០០នាទី ដល់ម៉ោង១២:០០នាទី ថ្ងៃត្រង់ ឯកឧត្តម ឡឹក សុធារ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមជាវាគ្មិនក្នុងកម្មវិធីសន្ទនាមតិ «ជីវិតយើង សង្គមយើង» នៃវិទ្យុជាតិកម្ពុជាAM918KHz និងវិទ្យុវត្តភ្នំ FM 105.70 MHz ដែលកម្មវិធីពិភាក្សាលើប្រធានបទ ស្ដីពី៖«ការផ្តល់ព័ត៌មានអំពីផលិតផលរបស់កសិករទៅមន្ត្រីកសិកម្ម»។

នៅក្នុងកិច្ចពិភាក្សា ឯកឧត្តមអនុរដ្ឋលេខាធិការ បានលើកឡើង ពីបច្ចុប្បន្នភាពនៃការដាក់ពង្រាយមន្រ្តីកសិកម្មឃុំ ចក្ខុវិស័យសម្រាប់កសិកម្ម ការជំរុញផលិតកម្ម ប្រកបដោយគុណភាព និងការស្វែងរកទីផ្សារកសិផល។ លើសពីនេះទៀត ឯកឧត្តមបានលើកខ្លីពីយន្តការ សហគមន៍កសិកម្មទំនើប ដែលជាយន្តការមួយអាចដោះ ស្រាយបញ្ហាគុណភាព ថ្លៃដើមក្នុងផលិតកម្ម និងទីផ្សារ។

កិច្ចពិភាក្សាក៏ផ្តល់ឱកាសដល់អ្នកចូលរួមទូរស័ព្ទចូលកម្មវិធី ដោយបានបង្ហាញការចាប់អារម្មណ៍ទៅលើទីផ្សារកសិផល ហើយពលរដ្ឋមួយចំនួនសាទរជាមួយនឹងតម្លៃកសិផលដូចជាស្រូវ និងដំឡូងមីជាដើម។ ទន្ទឹមនឹងនោះអ្នកចូលរួមក៏បានសំណូមពរ ដល់ក្រសួងកសិកម្ម រុក្ខាប្រមាញ់ និងនេសាទ ជំរុញការគាំទ្រ បច្ចេកទេសដល់ប្រជាកសិករ ជាពិសេសមុនពេលដាំដុះ និងបន្តគាំទ្រការជំរុញទីផ្សារកសិផលផងដែរ។

សូមបញ្ជាក់ថា វិទ្យុជាតិកម្ពុជាAM918KHz និងវិទ្យុវត្តភ្នំ FM 105.70 MHz តែងតែរៀបចំកម្មវិធីសន្ទនាមតិនេះ ដោយលើកយកប្រធានបទវិស័យកសិកម្ម ដើម្បីផ្ដល់ព័ត៌មាន ទៅដល់ប្រជាកសិករ ពីការខិតខំប្រឹងប្រែងរបស់រាជរដ្ឋាភិបាល និយាយជារួម និងក្រសួងកសិកម្ម រុក្ខាប្រមាញ់ និងនេសាទ និយាយដោយឡែក ក្នុងការបន្តធានាសន្តិសុខស្បៀង កម្ពុជាប្រកបដោយនិរន្តរភាព សេដ្ឋកិច្ច និងបរិស្ថាន ហើយកសិកម្មនៅតែចូលរួមចំណែកយ៉ាងសំខាន់ក្នុងសេដ្ឋកិច្ចជាតិ៕