ឯកឧត្តម គង់ ច័ន្ទវាសនា អនុញ្ញាតឱ្យប្រតិភូក្រុមហ៊ុន Universal Aliance ចូលជួបពិភាក្សាការងារ​

ចេញ​ផ្សាយ​ ១ ឧសភា ២០២៥ 2409

តបតាមការ​ចាត់តាំងដ៏ខ្ពង់ខ្ពស់របស់ឯកឧត្តម​ ឌិត​ ទីណា​ រដ្ឋមន្ត្រីក្រសួងកសិកម្ម​ រុក្ខាប្រមាញ់​ និង​នេសាទ​ នារសៀលថ្ងៃទី៣០​ ខែមេសា​ ឆ្នាំ២០២៥​ ឯកឧត្តមរដ្ឋលេខាធិការ​ គង់ ច័ន្ទវាសនា បានអនុញ្ញាតឱ្យប្រតិភូក្រុមហ៊ុន Universal Aliance​ និងអ្នកជំនាញផ្នែកបច្ចេកវិទ្យាដ្រូន​មកពីប្រទេសម៉ាឡេស៊ី ចូលជួបពិភាក្សាការងារ​។ កិច្ចពិភាក្សានេះ​មានការចូលរួមផងដែរដោយឯកឧត្តមអនុរដ្ឋលេខាធិការ​ ឡោ​ រស្មី​ ឯកឧត្តមប្រតិភូរាជរដ្ឋាភិបាលកម្ពុជា​ទទួលបន្ទុកអគ្គនាយកដ្ឋានកសិកម្ម​ ព្រមទាំងថ្នាក់ដឹកនាំរដ្ឋបាលព្រៃឈើ​ រដ្ឋបាលជលផល​ និងនាយកដ្ឋានជំនាញពាក់ព័ន្ធ។ 
ឯកឧត្តមរដ្ឋលេខាធិការបានបង្ហាញចំណាប់អារម្មណ៍​ និងវាយតម្លៃខ្ពស់ចំពោះបច្ចេកវិទ្យាដ្រូនទំនើបរបស់ក្រុមហ៊ុនដែលអាចប្រើប្រាស់ជាប្រយោជន៍ច្រើនយ៉ាងក្នុងអនុវិស័យនានានៃវិស័យកសិកម្ម​ ដូចជាការកំណត់ព្រំប្រទល់ដី​ ការរាប់ចំនួនដើមឈើ​ និងរុក្ខជាតិ​ ការបាច​ព្រោះគ្រាប់ពូជ​ ការតាមដានចលនាសត្វព្រៃកម្រ​ ការ​តាមដាន​បទល្មើសព្រៃឈើ​ និងនេសាទ​។ ល។ 
ឯកឧត្តមបានលើកទឹកចិត្តឱ្យអង្គភាពពាក់ព័ន្ធសិក្សា​ និងវាយតម្លៃតម្រូវការជាក់ស្តែងអំពីប្រភេទសេវាកម្ម​ដែលអង្គភាពនីមួយៗ​មានតម្រូវការក្នុងរយ:ពេលខ្លី​ មធ្យម​ និងវែង​ ដើម្បីពិនិត្យលទ្ធភាពស្វែងរកថវិកាគាំទ្រអនុវត្ត​ សំដៅបង្កើនល្បឿន​ការអភិវឌ្ឍវិស័យកសិកម្ម។ 
ទន្ទឹមនេះ​ ឯកឧត្តមបានណែនាំ​ និងលើកទឹកចិត្តដល់ក្រុមហ៊ុនឱ្យផ្តល់ព័ត៌មានលម្អិតអំពីសេវាកម្ម​ ការបណ្តុះបណ្តាល​ ប្រភេទដ្រូន​ និងតម្លៃ​សេវាកម្ម ដើម្បីក្រសួងអាចពិនិត្យលទ្ធភាព​ និងពិចារណាប្រើប្រាស់នាពេលអនាគត៕