ក្រុមការងារក្រសួងកសិកម្ម រុក្ខាប្រមាញ់ និងនេសាទ អញ្ជើញចុះសួរសុខទុក្ខ និងនាំយកអំណោយឧបត្ថម្ភជូនដល់ក្រុមអន្តរាគមន៍ថ្នាក់ជាតិបង្ក្រាបបទល្មើសជលផល ខេត្តសៀមរាប

ចេញ​ផ្សាយ​ ១១ កុម្ភៈ ២០២៤ 3001

នៅថ្ងៃទី១០ ខែកុម្ភៈ ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការ ឯកឧត្តម ទឹម បូរក្ស អនុរដ្ឋលេខាធិការ ជាតំណាងដ៏ខ្ពង់ខ្ពស់ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមជាមួយ ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល បានអញ្ជើញចុះសួរសុខទុក្ខ និងនាំយកអំណោយឧបត្ថម្ភ មានជាគ្រឿងឧបភោគបរិភោគ ជូនដល់ក្រុមអន្តរាគមន៍ថ្នាក់ជាតិ បង្ក្រាប បទល្មើសជលផលនៅបឹងទន្លេសាប ដែលប្រចាំការកន្លែងអភិរក្សជលផលកំពង់ភ្លុក ស្ថិតក្នុងស្រុកប្រាសាទបាគង ខេត្តសៀមរាប។

នាឱកាសនោះប្រតិភូបេសសកម្ម បានពាំនាំនូវការសួរសុខទុក្ខពីសំណាក់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជូនចំពោះបងប្អូនដែលជាកងអន្តរាគមន៍ថ្នាក់ជាតិបង្ក្រាបបទល្មើសជលផលនៅបឹងទន្លេសាបនោះ។

គួរបញ្ជាក់ថា អំណោយឧបត្ថម្ភ ដែលបានផ្តល់ជូនរួមមាន ថវិកាចំនួន ៥លានរៀល ប្រេងម៉ាស៊ូតចំនួន៧០០លីត្រ  អង្ករចំនួន៤បាវ សាច់ជ្រូកចំនួន១៨គីឡូក្រាម ស្រាបៀរចំនួន៥កេស  និងមានទាំងបន្លែចម្រុះមួយចំនួនផ្សេងទៀត។

ក្នុងដំណើរបេសសកម្មក៏មានសមាសភាពអញ្ជើញចូលរួមពីលោកនាយ នាយរងអធិការដ្ឋានរដ្ឋបាលជលផល ខាងជើងបឹងទន្លេសាប លោកនាយ នាយរងខណ្ឌ លោកនាយ នាយរងផ្នែក នៃខណ្ឌរដ្ឋបាលជលផលខេត្តសៀមរាប៕