ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច និងជាប្រធានក្រុមប្រឹក្សាជាតិកម្ពុជាដើម្បីកុមារ អញ្ជើញចូលរួមប្រជុំសាមញ្ញរបស់ក្រុមប្រឹក្សាជាតិកម្ពុជាដើម្បីកុមារ

ចេញ​ផ្សាយ​ ១១ មេសា ២០២៥ 5196

នៅថ្ងៃទី១០ ខែមេសា ឆ្នាំ២០២៥ ឯកឧត្តម ជា សុមេធី រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជាដើម្បីកុមារ បានអញ្ជើញចូលរួមកិច្ចប្រជុំសាមញ្ញលើកទី១ អាណត្តិទី៧នៃរាជរដ្ឋាភិបាលកម្ពុជា របស់ក្រុមប្រឹក្សាជាតិកម្ពុជាដើម្បីកុមារ ស្តីពីរបាយការណ៍លទ្ធផលការងារឆ្នាំ២០២៣-២០២៤ និងពិនិត្យ សម្រេចលើសេចក្តីព្រាងផែនការសកម្មភាពជាតិស្តីពីការទប់ស្កាត់ និងឆ្លើយតបចំពោះអំពើហិង្សាលើកុមារឆ្នាំ២០២៥-២០៣០ ដែលប្រព្រឹត្តទៅនៅទីស្តីការក្រសួងសង្គមកិច្ច។

ពិធីនេះក៏មានការចូលរួមពីសំណាក់ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាសមាជិកក្រុមប្រឹក្សាជាតិកម្ពុជាដើម្បីកុមារ  សមាជិកក្រុមប្រឹក្សាជាតិ មន្រ្តីជំនាញ និងអង្គការដៃគូផងដែរ។

នៅចំពោះមុខអង្គពិធី ឯកឧត្តមរដ្ឋមន្រ្តីក្រសួងសង្គមកិច្ច បានថ្លែងអំណរគុណ និងកោតសរសើរចំពោះថ្នាក់ដឹកនាំ សមាជិកក្រុមប្រឹក្សាជាតិ មន្រ្តីជំនាញ និងអង្គការដៃគូដែលបានផ្តល់ធាតុចូល និងខិតខំរៀបចំផែនការសកម្មភាពជាតិស្តីពីការទប់ស្កាត់ និងឆ្លើយតបចំពោះអំពើហិង្សាលើកុមារឆ្នាំ២០២៥-២០៣០ ប្រកបទៅដោយរលូន។

នាឱកាសនេះដែរ ឯកឧត្តមក៏បានជម្រាបបន្ថែមនូវលទ្ធផលសង្ខេបដែលក្រុមប្រឹក្សាអនុវត្តបានរួមមាន ៖ទី១.វឌ្ឍនភាពការងារកែសម្រួលព្រះរាជក្រិត្យ ២.ការលើកកំពស់ការយល់ដឹងអំពីសិទ្ធិកុមារ ៣.ការលើកកំពស់កុមារតាមប្រព័ន្ធអនឡាញ ៤.ការរៀបចំផែនការសកម្មភាពកុមារឆ្នាំ២០២៥-២០៣០ ៥.ការចូលរួមសន្និសិទពិភពលោកនៅ ប្រទេសកូឡំប៊ី និងទី៦.ការរៀចំសន្មិសីទថ្នាក់ជាតិ។ ឯបញ្ហាប្រឈមរួមមាន ទី១.ច្បាប់មិនទាន់បានផ្សព្វផ្សាយឱ្យទូលាយទាំងនៅថ្នាក់ជាតិនិងថ្នាក់ក្រោមជាតិ ២.ការគ្រប់គ្រងព័ត៌មានស្តីពីការរំលោភតាមប្រព័ន្ធអនឡាញនៅមានកម្រិត និងទី៣.ការរៀបចំច្បាប់មិនត្រូវបានអនុវត្តពេញលេញនៅឡើយ។

ជាទីបញ្ចប់ ឯកឧត្តមរដ្ឋមន្រ្តី ក៏បានលើកជាសំណូមពរនៅចំពោះមុខអង្គពិធី៖ ទី១.ចូលរួមពិនិត្យ និងដាក់បញ្ចូលបន្ថែមនូវធាតុចូល ២.សូមថ្នាក់ក្រសួងពាក់ព័ន្ធបញ្ចូលសិទ្ធិកុមារក្នុងគោលនយោបាយនៃប្រព័ន្ធការងារ ៣.ពន្លឿនឯកសារដើម្បីដាក់ជូនទៅទីស្តីការគណ:រដ្ឋមន្រ្តី ៤.ជម្រុញការផ្សព្វផ្សាយតាមប្រព័ន្ធអនឡាញទាំងថ្នាក់ជាតិនិងក្រោមជាតិ និងទី៥ជំរុញឱ្យមានការផ្សព្វផ្សាយសន្ធិសញ្ញាស្តីពីសិទ្ធិកុមារ៕