ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងសហការី បានអញ្ជើញចុះជួបសំណេះសំណាល និងចែក តង់ កូនត្រីអណ្តែង កូនកង្កែប និង ចំណី ជូនកសិករ ៥០ គ្រួសារ

ចេញ​ផ្សាយ​ ២៧ កក្កដា ២០២០ 3987

នៅរសៀលថ្ងៃសៅរ៍ ៥កើត ខែស្រាពណ៍ ឆ្នាំជូត ទោស័ក ពស២៥៦៤ ត្រូវនឹងថ្ងៃទី២៥ ខែកក្កដា ឆ្នាំ២០២០ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ រួមដំណើរដោយ ឯកឧត្តម ប៉ែន កុសល អភិបាលនៃគណៈអភិបាលខេត្តឧត្តរមានជ័យ ព្រមទាំងសហការី បានអញ្ជើញចុះជួបសំណេះសំណាល និងចែក តង់ កូនត្រីអណ្តែង កូនកង្កែប និង ចំណី ជូនកសិករ ៥០ គ្រួសារ នៅភូមិត្របែក សង្កាត់ បុស្បូវ ក្រុងសំរោង ខេត្តឧត្តរមានជ័យ។

លោក សាក់ សារិន ជាមន្ដ្រីបំរើការងារ នៅមណ្ឌលបណ្តុះបណ្តាល កសិកម្មសហគមន៍ បានចាប់ផ្ដើមចិញ្ចឹមកង្កែប ពីឆ្នាំ២០១៩ ដោយទិញកូនចូលចំនួន ៧០០ក្បាល បន្ទាប់មកបានលក់ចេញមួយចំនួន និងទុកធ្វើពូជខ្លះ។ បច្ចុប្បន្នបានរៀបចំកន្លែង(កៅស៊ូតង់)ចិញ្ចឹមកង្កែបចំនួន៦អាង និងអាងផលិតកូន មានមេបាចំនួន២៥ក្បាល និងមានកង្កែបសរុបប្រមាណ៣០០០ក្បាល  ។

- រយៈពេលបង្កាត់មួយខែកន្លះបង្កាត់ម្ដងៗ

- ពីពេលបង្កាត់រហូតដល់កូនអាចលក់បានរយៈពេលពី២៨ ទៅ៣០ថ្ងៃ។

- កូនអាយុមួយខែលក់ចេញមួយក្បាល ពី ៣៥០៛-៤០០៛ ។

   លោកបានអោយដឹងថាតាមរយះការបណ្ដុះបណ្ដាល ,ការចែករំលែក និងទស្សនកិច្ចសិក្សាកន្លងមក មានកសិករច្រើនដែលចាប់អារម្មណ៍ចំពោះការចិញ្ចឹមកង្កែបនេះ។

- មណ្ឌលបានចែករំលែកបទពិសោធន៍ដល់កសិករ និងបានលក់កូនអោយកសិករចិញ្ចឹមសាកល្បងចំនួន២គ្រួសារ ចំនួន៣០០កូន ។

ឆ្លៀតនាឱកាសនេះ ឯកឧត្តមរដ្ឋមន្រ្តី បានសម្តែងក្តីរីករាយដែលបានមកជួបសំណេះសំណាលជាមួយបងប្អូនប្រជាកសិករ នៅក្រុងសំរោង ខេត្តឧត្តរមានជ័យនាពេលនេះ និងបានពាំនាំនូវបណ្តាំផ្ញើសួរសុខទុក្ខពីសំណាក់ សម្តេចតេជោ និងសម្តេចកិត្តិព្រឹទ្ធបណ្ឌិត ប្រមុខរាជរដ្ឋាភិបាល ដែលលោកទាំងទ្វេតែងតែគិតគូរពីសុខទុក្ខប្រជាពលរដ្ឋគ្រប់ៗរូប។ ជាក់ស្តែងថ្មីៗនេះ សម្តេចប្រមុខរាជរដ្ឋាភិបាលបានផ្តល់ការគាំទ្រក្នុងវិស័យកសិកម្ម តាមរយៈការផ្តល់ជូនកសិករក្នុងមួយគ្រួសារទទួលបាន តង់ផ្លាស្ទិក ១ កូនត្រីអណ្តែង ៦០០ក្បាល កូនកង្កែប ៤៥០ក្បាល និងចំណី ៧៥គីឡូក្រាម ដើម្បីអាចមានលទ្ធភាពបង្កើនប្រាក់ចំណូល ជំរុញសន្តិសុខស្បៀង និងបង្កើតឱកាសការងារបន្ថែមជូនប្រជាជន នៅក្នុងឱកាសនៃបញ្ហាជំងឺឆ្លងរាតដាល កូវីដ១៩នេះ។ ក្រៅពីការជួយឧបត្ថម្ភគាំទ្រនេះ ក្រសួងក៏កំពុងជំរុញឱ្យគម្រោងដៃគូនានា បន្តការគាំទ្របន្ថែមទៀតទាំងសម្ភារៈ និងបច្ចេកទេស ដូចជាការដាំដុះបន្លែ និងចិញ្ចឹមសត្វផងដែរ។ ឯកឧត្តមរដ្ឋមន្រ្តី ក៏បានផ្តាំផ្ញើឱ្យមន្រ្តីក្រោមឱវាទ បន្តការគាំទ្រ តាមដានសកម្មភាពនេះឱ្យបានខ្ជាប់ខ្ជួន និងជួយផ្សារភ្ជាប់រវាងបណ្តុំកសិករចិញ្ចឹមទៅទីផ្សារផង ដើម្បីកាត់បន្ថយហានិភ័យអស្ថេរភាពតម្លៃ ព្រមទាំងផ្តាំផ្ញើដល់ប្រជាកសិករដែលមានសមត្ថភាពចិញ្ចឹមគ្រប់គ្រាន់សូមបន្តចែករំលែកចំណេះដឹងការចិញ្ចឹមនេះដល់ អ្នកជិតខាងដែលមានការចាប់អារម្មណ៍ផង។