កិច្ចប្រជុំលើកទី៥ របស់គណៈកម្មការតម្រង់ទិសនៃកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (CAPFISH)

ចេញ​ផ្សាយ​ ២៥ វិច្ឆិកា ២០២២ 18414

នៅថ្ងៃទី២៤ ខែវិច្ឆិកា ឆ្នាំ២០២២  ឯកឧត្តម ហាស់ សារ៉េត រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ និងជាប្រធានគណៈកម្មការតម្រង់ទិសកម្មវិធី បានដឹកនាំកិច្ចប្រជុំលើកទី៥ របស់គណៈកម្មការតម្រង់ទិសនៃកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (CAPFISH) ដោយមានការអញ្ជើញចូលរួមពី លោក ហ៊ុល បុណ្ណារ័ត្ន ប្រធាននាយកដ្ឋានសហប្រតិបត្តិការពហុភាគី តំណាងឯកឧត្តម ហែម វណ្ឌី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក Bryan FORNARI ប្រធានកិច្ចសហប្រតិបត្តិការនៃប្រតិភូសហភាពអឺរ៉ុបប្រចាំកម្ពុជា និងជាសហប្រធាន និងឯកឧត្តម លោក លោកស្រីជាសមាជិកគណៈកម្មការតម្រង់ទិសកម្មវិធីមកពីក្រសួងពាក់ព័ន្ធ លោក លោកស្រីជាមន្រ្តីអនុវត្តកម្មវិធី និងទីប្រឹក្សាបច្ចេកទេសនៃអង្គការ FAO, UNIDO និងអង្គការ UNESCO រួមទាំងអង្គការដៃគូរ Oxfam, Save the Children, WCS, Aid et Action ឬតំណាង បានចូលរួមប្រជុំផ្ទាល់ និងពីចម្ងាយតាម Zoom ដែលមានចំនួនសរុប៦៧នាក់ នៅសណ្ឋាគារសុខា ខេត្តព្រះសីហនុ។

ជាកិច្ចចាប់ផ្តើម ឯកឧត្តម ស្រ៊ុន លឹមសុង អនុប្រធានរដ្ឋបាលជលផល និងជាអនុប្រធានកម្មវិធី បានមានមតិស្វាគមន៍ដល់គណៈអធិបតី សមាជិក សមាជិការ ដែលបានអញ្ជើញចូលរួមក្នុងកិច្ចប្រជុំគណៈកម្មការតម្រង់ទិសលើកទី៥នេះ និងបានជម្រាបពីរបៀបវារៈនៃកិច្ចប្រជុំ។
ឯកឧត្តម ហាស់ សារ៉េត បានថ្លែងពីគោលបំណងនៃកិច្ចប្រជុំ គឺដើម្បីធ្វើការឆ្លុះបញ្ចាំងពីការអនុវត្តសកម្មភាពគម្រោង លទ្ធផលវឌ្ឍនភាពសម្រេចបាន ចំនុចសំខាន់ៗដែលបានរៀនសូត្រ និងបញ្ហាប្រឈមនានាដែលបានជួបប្រទះ ក្នុងពេលអនុវត្តដោយថ្នាក់ដឹកនាំ មន្ត្រីបច្ចេកទេសរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ អង្គការគាំទ្របច្ចេកទេស និងអង្គការពាក់ព័ន្ធនានា ដើម្បីឆ្លើយតបទៅនឹងសូចនាករសំខាន់ៗទាំង៨ ដូចមានចែងនៅក្នុងកិច្ចព្រមព្រៀងហិរញ្ញវត្ថុ (Financing Agreement) រវាងរាជរដ្ឋាភិបាលកម្ពុជាជាមួយនឹងសហភាពអឺរ៉ុប ជូនដល់ប្រធាន និងសហប្រធានគណៈកម្មការតម្រង់ទិសនៃកម្មវិធី និងដើម្បីទទួលបាននូវអនុសាសន៍ល្អៗដើម្បីចូលរួមកែលម្អការអនុវត្តកម្មវិធីឲ្យកាន់តែល្អប្រសើបន្ថែមទៀត។ ឯកឧត្តមប្រធាន បានប្រកាសបើកកិច្ចប្រជុំ និងបានដឹកនាំសម្របសម្រួលកិច្ចប្រជុំតាមរបៀបវារៈដែលបានគ្រោងទុក។

ឯកឧត្តម ប្រធានបានអញ្ជើញ លោកតំណាងឯកឧត្តម ហែម វណ្ឌី រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ និងលោក Bryan FORNARI ប្រធានកិច្ចសហប្រតិបត្តិការនៃប្រតិភូសហភាពអឺរ៉ុបប្រចាំកម្ពុជា ដែលជាសហប្រធាននៃកិច្ចប្រជុំគណៈកម្មការតម្រង់ទិសកម្មវិធី ដើម្បីថ្លែងសុន្ទរកថាស្វាគមន៍ និងបានបញ្ជាក់ពីកិច្ចខិតខំដើម្បីបន្តកិច្ចសហការ និងគាំទ្រដល់ដំណើរការអនុវត្តកម្មវិធី CAPFISH-Capture ដែលគាំទ្រថវិកាដោយសហភាពអឺរ៉ុប។

បន្ទាប់ពីការធ្វើបទបង្ហាញពីភាគីពាក់ព័ន្ធនឹងការអនុវត្តគម្រោង ឯកឧត្តមប្រធាន បានថ្លែង កោតសរសើរដល់មន្ត្រីបច្ចេកទេស  រដ្ឋបាលជលផល ទីប្រឹក្សា អ្នកជំនាញការជាតិ អន្តរជាតិ អង្គការ និងអ្នកពាក់ព័ន្ធទាំងអស់ដែលបានអនុវត្តការងារយ៉ាងសកម្ម និងទទួលបានលទ្ធផលយ៉ាងល្អ ទោះបីជាយើងបានជួបប្រទះបញ្ហាប្រឈមនានាមួយចំនួន។ 

ឯកឧត្តមប្រធាន សហប្រធាន រួមទាំង លោក Bryan FORNARI ប្រធានកិច្ចសហប្រតិបត្តិការនៃប្រតិភូសហភាពអឺរ៉ុបបានឯកភាពលើរបាយការណ៏វឌ្ឍន្នភាព ផែនការបន្ត និងបានផ្តល់អនុសាសន៍មួយចំនួនដើម្បីចូលរួមកែលម្អការអនុវត្តកម្មវិធីឲ្យកាន់តែល្អប្រសើរ។