Other News
ឯកឧត្តមបណ្ឌិត ហ៊ាន វណ្ណហន អញ្ជើញដឹកនាំក្រុមការងារជំនាញ ចុះពិនិត្យ និងគាំទ្ររោងចក្រកែច្នៃដំឡូងមី នៅខេត្តរតនគិរី
ចេញផ្សាយ ៩ កក្កដា ២០២៦ 1009
នៅរសៀលថ្ងៃទី៨ ខែកក្កដា ឆ្នាំ២០២៦ ឯកឧត្តមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានខេត្តរតនគិរី បានដឹកនាំក្រុមការងារជំនាញនៃមន្ទីរកសិកម្មខេត្តរតនគិរី ជួបពិភាក្សាការងារ ជាមួយតំណាងរោងចក្រកែច្នៃម្សៅដំឡូងមីរបស់ក្រុមហ៊ុន ជាទូច ត្រេឌីង ស្ថិតនៅភូមិសោមគល់ ឃុំសោមធំ ស្រុកអូរយ៉ាដាវ ខេត្តរតនគិរី។
ក្នុងជំនួបពិភាក្សា ឯកឧត្តមបណ្ឌិតបានគូសបញ្ជាក់ថា ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ យកចិត្តទុកដាក់ខ្ពស់លើការជំរុញ និងលើកទឹកចិត្តវិនិយោគិនក្នុងការកែច្នៃកសិផល ព្រមទាំងការសម្របសម្រួល នីតិវិធីផ្លូវច្បាប់ពាក់ព័ន្ធនឹងការនាំចេញផលិតផលកសិកម្ម ទៅកាន់ទីផ្សារប្រទេសទី៣ ពីបណ្តាខេត្ត ក៏ដូចក្នុងតំបន់មេគង្គលើ ជាពិសេសខេត្តរតនគិរី ដែលជាខេត្តមានសក្តានុពលខ្ពស់ និងមានព្រំដែនជាប់ជាមួយសាធារណរដ្ឋសង្គមនិយមវៀតណាម។
ក្នុងនាមជាតំណាងរដ្ឋលេខាធិការទទួលបន្ទុកវិស័យកសិកម្ម រុក្ខាប្រមាញ់ និងនេសាទនៅខេត្តរតនគិរី ឯកឧត្តមបណ្ឌិតបានណែនាំឱ្យមន្ត្រីជំនាញ នៃមន្ទីរកសិកម្មនេសាទខេត្ត សហការយ៉ាងជិតស្និទ្ធជាមួយតំណាងរោងចក្រ ដើម្បីសម្របសម្រួលការងារពាក់ព័ន្ធ និងផ្តល់ការគាំទ្រតាមតម្រូវការជាក់ស្តែង សំដៅជួយឱ្យដំណើរការផលិត និងអាជីវកម្មរបស់រោងចក្រប្រព្រឹត្តទៅដោយរលូន ប្រសិទ្ធភាព និងនិរន្តរភាព។
សូមបញ្ជាក់ថា រោងចក្រកែច្នៃម្សៅដំឡូងមីក្រុមហ៊ុន ជាទូច ត្រេឌីង បច្ចុប្បន្ន ប្រមូលទិញដំឡូងមីស្រស់ពីខេត្តសៀមរាប ព្រះវិហារ បន្ទាយមានជ័យ ឧត្តរមានជ័យ និងខេត្តរតនគិរី ទិញបានប្រមាណពី១០ម៉ឺន ដល់ ២០ម៉ឺនតោនក្នុងមួយឆ្នាំ។ ក្នុងនោះរោងចក្រដំណើរការផលិតត្រឹមតែចន្លោះពីខែសីហា ដល់ខែមីនា ខណៈដែលចាប់ពីខែមេសា ដល់ខែកក្កដា ជារដូវដាំដុះដំឡូងមី៕
