Other News
ឯកឧត្តម ទឹម បូរក្ស អនុរដ្ឋលេខាធិការ ក្រសួងកសិកម្ម អញ្ជើញចូលរួមក្នុងសិក្ខាសាលាពិគ្រោះយោបល់លើកចុងក្រោយស្តីពី ការដាក់តំបន់ព្រៃលិចទឹក និងព្រៃឬស្សី មាត់ឃ្មង់ ជាតំបន់ការពារធម្មជាតិ
ចេញផ្សាយ ២៣ មិថុនា ២០២៤ 2130
នៅថ្ងៃទី២១ ខែមិថុនា ឆ្នាំ ២០២៤ ឯកឧត្តម ទឹម បូរក្ស អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញចូលរួមក្នុងសិក្ខាសាលាពិគ្រោះយោបល់លើកចុងក្រោយស្តីពី «ការដាក់តំបន់ព្រៃលិចទឹក និងព្រៃឬស្សី មាត់ឃ្មង់ ជាតំបន់ការពារធម្មជាតិ» ដែលតំបន់នេះស្ថិតនៅសងខាងផ្លូវជាតិលេខ៧ ក្នុងឃុំទន្លេបិទ ឃុំជីរោទ៍ទី១ ជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ ដោយកិច្ចប្រជុំប្រព្រឹត្តទៅនៅខេត្តត្បូងឃ្មុំ។
សិក្ខាសាលាពិគ្រោះយោបល់លើកចុងក្រោយនោះ ដឹកនាំការពិភាក្សាដោយ ឯកឧត្តម ជា សំអាង រដ្ឋលេខាធិការ ក្រសួងបរិស្ថាន និងមានសមាសភាពចូលរួមពី ឯកឧត្តម ទ្បោ ដាវុធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម អ៊ុក វុទ្ធី អនុរដ្ឋលេខាធិការក្រសួងធនធានទឹក និងឧតុនិយម ឯកឧត្តម ចេង ប៊ុណ្ណារ៉ា អភិបាលរងខេត្តត្បូងឃ្មុំ មន្ទីរជំនាញពាក់ព័ន្ធ និងតំណាងរដ្ឋបាលស្រុកត្បូងឃ្មុំ មេឃុំ សរុបអ្នកចំនួន៣៨នាក់។
ជាលទ្ធផលនៃកិច្ចប្រជុំ អង្គប្រជុំបានឯកភាព៣ចំនុច៖ទី១.ការដាក់បញ្ជូលតំបន់ព្រៃលិចទឹក និងព្រៃឬស្សីមាត់ឃ្មង់ និងបឹងជុំវិញជាតំបន់ការពារធម្មជាតិ ទី២. ឯកភាព ឱ្យក្រុមការងាររដ្ឋបាលខេត្តត្បួងឃ្មុំ និងក្រុមការងារនាយកដ្ឋានអភិរក្សតំបន់ដីសើមទឹកសាប ពិនិត្យលទ្ធភាព ក្នុងការបញ្ជូលបន្ថែមប្រព័ន្ធអូរ ប្រឡាយទឹក និងទីតាំងរណ្តៅ ដែលបានកាយដីយកចាក់បំពេញនៅទីទួលសុវត្ថិភាព ទៅក្នុងតំបន់ការពារធម្មជាតិ និងសិក្សាបន្ថែមលើទីតាំងអាស្រ័យផលរបស់ប្រជាពលរដ្ឋលើតំបន់បឹងប្រា ។
ចុងក្រោយចំនុចទី៣. អង្គប្រជុំសម្រេចឱ្យមានកិច្ចប្រជុំរវាងក្រុមការងារក្រសួងបរិស្ថាន ជាមួយក្រសួងកសិកម្ម រុក្ខាប្រមាញ់ និងនេសាទ និងក្រសួងធនធានទឹក និងឧតុនិយម ពិនិត្យមើលផែនទីចុងក្រោយនៃទីតាំងស្នើសុំដាក់ជាតំបន់ការពារធម្មជាតិ និងតួនាទីភារកិច្ចរបស់ក្រសួងទាំងពីរនៅក្នុងសេចក្តីព្រាងអនុក្រឹត្យ មុនដាក់ស្នើសុំសម្រេចពីរាជរដ្ឋាភិបាលកម្ពុជា៕
