ឯកឧត្តមអនុរដ្ឋលេខាធិការ ទឹម បូរក្ស អញ្ជើញដឹកនាំក្រុមការងារចុះត្រួតពិនិត្យ និងបង្រ្កាបបទល្មើសជលផលនៅស្រុកចំនួនពីរ ក្នុងខេត្តត្បូងឃ្មុំ

ចេញ​ផ្សាយ​ ២៤ មេសា ២០២៥ 3547

នៅថ្ងៃទី២៤ ខែមេសា ឆ្នាំ២០២៥ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការចង្អុលបង្ហាញពី ឯកឧត្តមរដ្ឋលេខាធិការ ហាស់ សារ៉េត  អញ្ជើញដឹកនាំសមត្ថកិច្ចចម្រុះរួមមាន មន្ត្រីជំនាញខណ្ឌរដ្ឋបាលជលផលត្បូងឃ្មុំ ដឹកនាំដោយលោក  ស៊ុន សារ៉ាត់ អនុប្រធានមន្ទីរកសិកម្មខេត្ត ដោយមានការចូលរួមសហការពីសមត្ថកិច្ចអធិការដ្ឋានរដ្ឋបាលជលផលមេគង្គ បានចុះត្រួតពិនិត្យ និងបង្រ្កាបបទល្មើសជលផល បានចំនួន៣គោលដៅ នៅស្រុកចំនួនពីរ ក្នុងខេត្តត្បូងឃ្មុំ។

បើតាមឯកឧត្តមអនុរដ្ឋលេខាធិការ គោលដៅចំនួនបីដែលក្រុមការងារចុះត្រួតពិនិត្យ និងបង្ក្រាបនៅក្នុងភូមិសាស្រ្តស្រុកត្បូងឃ្មុំ និងស្រុកក្រូចឆ្មារ រួមមាន៖ គោលដៅទី១ នៅភូមិសាស្រ្តបឹងទន្សោង ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ ដោយពុំប្រទះឃើញមានបទល្មើសនេសាទជាក់ស្ដែងណាមួយគួរឱ្យកត់សម្គាល់នោះឡើយ។ គោលដៅទី២ ស្ថិតនៅភូមិសាស្រ្តកន្លែងអភិរក្សបឹងត្រែង ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ បានចុះត្រួតពិនិត្យដំណាំស្រូវ និងស្ថានភាពផ្ទៃបឹងដែលគោករីងស្ងួតធ្វើឱ្យប្រជាពលរដ្ឋខ្វះខាតទឹកស្រោចស្រពដំណាំស្រូវដែលអាស្រ័យផលនៅជុំវិញបឹងនេះ និងគោលដៅទី៣ ក្រុមការងារបានចុះល្បាត ត្រួតពិនិត្យដីព្រៃលិចទឹកនៅក្នុងភូមិសាស្រ្ត ចំណុចពោះអំបែង ឃុំទួលស្នួល ស្រុកក្រូចឆ្មារ ខេត្តត្បូងឃ្មុំ ដែលស្ថិតនៅក្នុងតំបន់កម្លាំងយោធាប្រចាំការគោលដៅទី៤។ 

ទន្ទឹមនឹងនេះ ឯកឧត្តមអនុរដ្ឋលេខាធិការ បានគូសបញ្ជាក់ថា  ជាលទ្ធផល ក្រុមការងារបានប្រទះឃើញមានបទល្មើសលួចឈូសឆាយដីព្រៃលិចទឹក ដុតព្រៃលិចទឹក ដែលជនសង្ស័យបានប្រមូលទុក និងបានចុចយកនិយាមកា ដើម្បីដឹងច្បាស់ពីទំហំផ្ទៃដីព្រៃលិចទឹកដែលជនសង្ស័យបានលួចឈូសឆាយ និងបន្តស្រាវជ្រាវរកជនសង្ស័យ យកទៅអនុវត្តតាមនីតិវិធីច្បាប់ស្ដីពីជលផល។

ជាមួយគ្នានេះ ឯកឧត្តមអនុរដ្ឋលេខាធិការ ទឹម បូរក្ស ក៏បានប្រជុំនៅខណ្ឌរដ្ឋបាលជលផលត្បូងឃុំ ដើម្បីផ្តាំផ្ញើសួរសុខទុក្ខពីឯកឧត្តមរដ្ឋមន្រី្ត និងពង្រឹងការងារ មន្រ្តីខណ្ឌរដ្ឋបាលជលផលត្បូងឃ្មុំថែមទៀតផង៕