កិច្ចប្រជុំពិភាក្សាស្តីអំពីសភាពការណ៍សន្តិសុខនៅក្នុង និងជុំវិញអាកាសយានដ្ឋានអន្តរជាតិខេត្តព្រះសីហនុ

ចេញ​ផ្សាយ​ ២១ សីហា ២០២៥ 3871

កាលពីថ្ងៃទី១៩ ខែសីហា ឆ្នាំ២០២៥ លោកបណ្ឌិត ឌី សំអាន អនុប្រធាននាយកដ្ឋានការពារដំណាំ អនាម័យ និងភូតគាមអនាម័យ និងសហការី០១រូប បានចូលរួមប្រជុំពិភាក្សាស្តីអំពីសភាពការណ៍សន្តិសុខនៅក្នុង និងជុំវិញអាកាសយានដ្ឋានអន្តរជាតិខេត្តព្រះសីហនុ ក្រោមអធិបតីភាពឯកឧត្តម វ៉ាន់ ណូរ៉ាក់ នាយកអាកាសយានដ្ឋានអន្តរជាតិខេត្តព្រះសីហនុ ដោយមានការអញ្ជើញចូលរួមពីតំណាងអគ្គស្នងការនគរបាលជាតិ អគ្គនាយកដ្ឋានអន្តោប្រវេសន៍ កងរាជអាវុធហត្ថលើផ្ទៃប្រទេស រដ្ឋបាលខេត្តព្រះសីហនុ តំណាងសាខាគយនិងរដ្ឋាករកម្ពុជា ក្រុមហ៊ុនអាកាសចរណ៍ និងអង្គភាពពាក់ព័ន្ធមួយចំនួនទៀត ដែលមានអ្នកចូលរួមសរុបចំនួន ២០រូប។
ឆ្លៀតក្នុងឱកាសនោះដែរ ឯកឧត្តមប្រធានអង្គប្រជុំបានស្នើសុំឱ្យអង្គភាពដែលពាក់ព័ន្ធត្រូវពង្រឹងការងារមួយចំនួន ដូចខាងក្រោម៖
-ស្នើសុំឱ្យសមាជិកគណ:កម្មាធិការជាតិសន្តិសុខអាកាសចរណ៍ស៊ីវិល ត្រូវបន្តសហការគ្នាឱ្យបានល្អក្នុងការអនុវត្តការងារទៅតាមតួនាទីភារកិច្ចរៀងៗខ្លួន និងត្រូវចូលរួមប្រជុំឱ្យបានទៀងទាត់រៀងរាល់ ៣ខែម្តង លើការអនុវត្តការងាររួម និងបញ្ហាប្រឈមដែលត្រូវដោះស្រាយ។ ប្រសិនបើសមាជិកគណៈកម្មាធិការអវត្តមានមិនអាចចូលរួមបាន ត្រូវចាត់តំណាងមកចូលរួមជំនួស
-ស្នើសុំឱ្យជួយពន្លឿនដាក់បញ្ជូនសមាសភាពមន្រ្តីនៃក្រសួងកសិកម្ម រុក្ខាប្រមាញ់ និងនេសាទ ដើម្បីប្រចាំការក្នុងការចូលរួមត្រួតពិនិត្យរាល់ទំនិញដែលជាកម្មវត្ថុនៃការត្រួតពិនិត្យភូតគាមអនាម័យ ដើម្បីទប់ស្កាត់ការរីករាលដាលសមាសភាពចង្រៃចូលមកក្នុងព្រះរាជាណាចក្រកម្ពុជា ព្រោះអាកាសយានដ្ឋានអន្តរជាតិព្រះសីហនុនឹងដាក់ដំណើរការឃ្លាំងទំនិញថ្មី(CARGO) ក្នុងពេលឆាប់ៗខាងមុខនេះដែលនឹងទទួលទំនិញជាច្រើនប្រភេទពីក្រៅប្រទេស រួមមាន៖ ប្រទេសចិន ថៃ ម៉ាឡេស៊ី.....។