លោកជំទាវអនុរដ្ឋលេខាធិការ អ៊ឹម រចនា អញ្ជើញដឹកនាំកិច្ចប្រជុំ​ជាមួយ​អង្គការ UNIDO ដើម្បីរៀបចំកម្មវិធីទស្សនកិច្ចអ្នក​សារព័ត៌មាន​លើកទី៣ នៅរាជធានីភ្នំពេញ ខេត្តកំពង់ធំ សៀមរាប និងខេត្តកំពង់ចាម

ចេញ​ផ្សាយ​ ៤ កញ្ញា ២០២៥ 684

នៅថ្ងៃទី៣ ខែកញ្ញា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំជាមួយ​ប្រធាន​ទីប្រឹក្សាបច្ចេកទេស នៃអង្គការអភិវឌ្ឍន៍ឧស្សាហកម្មសហប្រជាជាតិ ហៅ​កាត់​ថា (UNIDO) លោកបណ្ឌិត Seetharama Shetty THOMBATHU និងសហការី រួមជាមួយតំណាងពីសហភាពអឺរ៉ុប EU និងតំណាងរដ្ឋបាល​ជលផល FiA ដើម្បីត្រៀមរៀបចំទស្សនកិច្ចសិក្សា​សម្រាប់អ្នកសារព័ត៌មានជា​លើក​ទី៣ ទៅកាន់សហគ្រាសកែច្នៃផលិតផល​ជលផល (ប្រហុក និងម៉្សៅប្រហុក) ដែលនឹងប្រព្រឹត្តទៅចាប់ពីថ្ងៃទី០៨ ដល់ថ្ងៃទី១១ ខែកញ្ញា ឆ្នាំ២០២៥នៅរាជធានីភ្នំពេញ ខេត្តសៀមរាប ខេត្តកំពង់ធំ និងខេត្តកំពង់ចាម។

នៅក្នុងកិច្ចប្រជុំ ដែលធ្វើនៅទីស្ដីការក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា បានសម្តែងការស្វាគមន៍ និងថ្លែងអំណរគុណដល់​អង្គការ UNIDO សហភាពអឺរ៉ុប EU និងរដ្ឋបាលជលផល ចំពោះកិច្ចសហការ​ជាមួយ​ក្រសួង ដើម្បីដឹកនាំអ្នកសារព័ត៌មាន៤១រូប មកពី២៣ស្ថាប័ន​សារព័ត៌មាន រួមជាមួយអង្គការស្ថាប័នពាក់ព័ន្ធសរុបប្រមាណ៧០រូប ចុះទៅ​រោងចក្រផលិត និងកែច្នៃប្រហុកម៉្សៅ និងសហគ្រាសផ្គត់ផ្គង់ប្រហុកGI (ម៉ាកសម្គាល់ភូមិសាស្រ្ត) ដែលមានវិញ្ញាបនបត្រ CQS។

លោកជំទាវបានគូសបញ្ជាក់ថា កម្មវិធីនេះគឺជាឱកាសសម្រាប់​អ្នកសារព័ត៌មានបានចុះជួបផ្ទាល់ ផ្តិតរូបភាពពីខ្សែច្រវាក់ផលិតកម្មកែច្នៃប្រហុក បង្កើនការផ្សព្វផ្សាយដល់សាធារណជន អំពីផលិតផលរបស់ខ្មែរ ដែលមានគុណភាព សុវត្ថិភាព និងប្រកបដោយស្តង់ដារខ្ពស់។

សូមបញ្ជាក់ថា កម្មវិធីទស្សនកិច្ចសិក្សា និងផ្សព្វផ្សាយលើកទី៣នេះ ជាពេលវេលា និងឱកាសចុងក្រោយ ដើម្បីបង្ហាញអំពីសមិទ្ធផល​របស់​គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ទទួលហិរញ្ញប្បទានពីសហភាពអឺរុប នឹងបិទបញ្ចប់នាខែធ្នូ ឆ្នាំ២០២៥។ នេះគឺជាលើកទី៣ហើយ ដែល ក្រសួង និងអង្គការ UNIDO សហការរៀបចំ ដំណើរទស្សនកិច្ចអ្នកសារព័ត៌មាន ដោយដំណើរទស្សនកិច្ចលើកទី១ រៀបចំធ្វើកាលពី ខែកញ្ញា ឆ្នាំ២០២៣ និងដំណើរទស្សនកិច្ចលើកទី២ រៀបចំធ្វើកាលពីខែកក្កដា ឆ្នាំ២០២៤ បាន ទទួលជោគជ័យគួរជាទីមោទនៈ៕