លោកជំទាវអនុរដ្ឋលេខាធិការ អ៊ឹម រចនា ទទួលជួបពិភាក្សាការងារជាមួយ ក្រុមការងារអង្គការ FAO អំពីការត្រៀមរៀបចំ ដំណើរទស្សនកិច្ចសម្រាប់អ្នកសារព័ត៌មាន ទៅកាន់​ខេត្តពោធិ៍សាត់

ចេញ​ផ្សាយ​ ២៣ មេសា ២០២៥ 2480

នៅថ្ងៃទី២២ ខែមេសា ឆ្នាំ២០២៥ លោកជំទាវ អ៊ឹម រចនា អនុរដ្ឋលេខាធិការក្រសួង​កសិកម្ម រុក្ខាប្រមាញ់ និងនេសាទ ទទួលបន្ទុកការងារព័ត៌មាន និងទំនាក់ទំនង​សាធារណៈ បានទទួលជួបពិភាក្សាការងារ ជាមួយតំណាងអង្គការស្បៀង និងកសិកម្ម​នៃសហប្រជាជាតិ (FAO) ដើម្បីជជែកពិភាក្សាពីការត្រៀមរៀបចំដំណើរ​ទស្សនកិច្ច​សម្រាប់អ្នកសារព័ត៌មាន ទៅកាន់ខេត្តពោធិ៍សាត់។ ជំនួបនេះធ្វើឡើង នៅទីស្តីការ​ក្រសួង​កសិកម្ម រុក្ខាប្រមាញ់ និងនេសាទ។
នៅក្នុងជំនួបនោះ លោកជំទាវ អ៊ឹម រចនា បានសម្តែងការស្វាគមន៍ ចំពោះកិច្ចសហការ​រវាងក្រសួង ជាមួយអង្គការ (FAO) និងរដ្ឋបាលជលផល ដើម្បីរៀបចំដំណើរទស្សនកិច្ចសម្រាប់អ្នកសារព័ត៌មាន ទៅកាន់ខេត្តពោធិ័សាត់ នាចុងខែមេសា ឆ្នាំ២០២៥នេះ ដើម្បីសម្រេចគោលដៅ ក្នុងបំណងពង្រីកការផ្សព្វផ្សាយព័ត៌មានពិត និងមានខ្លឹមសារ​គ្រប់ជ្រុងជ្រោយ ទៅកាន់សាធារណជន អំពីសមិទ្ធផលនៃការគ្រប់គ្រងធនធាន​ជល​ផល​​ទឹកសាបនៅកម្ពុជា។ 
នៅក្នុងដំណើរទស្សន​កិច្ច​នេះ អ្នកសារព័ត៌មានចំនួន ២០នាក់ មកពីស្ថាប័នសារព័ត៌មានគ្រប់ទម្រង់ចំនួន ១០ស្ថាប័ន នឹងអញ្ជើញទៅទស្សនាតំបន់អភិរក្សព្រៃលិចទឹកសំខាន់ៗមួយចំនួន ក្នុងខេត្ត​ពោធិ៍សាត់ ផ្តិតយករូបភាពជាក់ស្តែង ជួបសម្ភាសផ្ទាល់ប្រជាសហគមន៍ មន្ដ្រីជំនាញ និងអង្គភាពពាក់ព័ន្ធ យកទៅផ្សព្វផ្សាយបន្ត។ 
សូមបញ្ជាក់ថា ដំណើរការរៀបចំដំណើរទស្សនកិច្ចអ្នកសារព័ត៌មាននេះ គឺជាផ្នែកមួយ​នៃ​​កម្មវិធី «ទិវាភពផែនដី» ក្រោមប្រធានបទ «ការគ្រប់គ្រងធនធានជលផល​​​​​​​ប្រកប​ដោយ​ចីរភាព» ដែលនឹងធ្វើឡើងនៅថ្ងៃទី២៩-៣០ ខែមេសា ឆ្នាំ២០២៥ នៅរាជធានី​ភ្នំពេញ និងខេត្តពោធិ៍សាត់ នាថ្ងៃខាងមុខនេះ៕