ឯកឧត្តមអនុរដ្ឋលេខាធិការ ហុង ណារិត អញ្ជើញបន្តដឹកនាំក្រុមការងារចុះពិនិត្យការប្រមូលផលស្រូវរបស់ប្រជាកសិករ និងជួបសំណេះសំណាលជាមួយម្ចាស់រោងម៉ាស៊ីនកិនស្រូវ នៅខេត្តបន្ទាយមានជ័យ

ចេញ​ផ្សាយ​ ២២ មករា ២០២៥ 2627

នៅថ្ងៃទី២១ ខែមករា ឆ្នាំ២០២៥ ឯកឧត្តម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក សាន វួន អនុប្រធានមន្ទីរកសិកម្មខេត្ត និងសហការី លោកមេឃុំ មេភូមិ និងមន្រ្តីកសិកម្មឃុំ បានចុះពិនិត្យការផលិត និងប្រមូលផលស្រូវរបស់ប្រជាកសិករ ព្រមទាំងជួបសំណេះសំណាលជាមួយម្ចាស់រោងម៉ាស៊ីនកិនស្រូវ ស្ថិតនៅឃុំរហាល ស្រុកព្រះនេត្រព្រះ ខេត្តបន្ទាយមានជ័យ។

ក្នុងដំណើរចុះពិនិត្យនេះ ឯកឧត្តមអនុរដ្ឋលេខាធិការ បានពន្យល់យ៉ាងស៊ីជម្រៅពីការធ្លាក់ចុះថ្លៃ នៃប្រភេទពូជស្រូវអូអឹម៥៤៥១ ដែលជាពូជស្រូវនាំចូលពីបរទេស។ ជាមួយគ្នានោះ ឯកឧត្តមបានណែនាំឱ្យប្រជាកសិករងាកមកប្រើប្រាស់ពូជស្រូវក្នុងស្រុក ដោយមានស្ថិរភាពថ្លៃលក់។ មិនត្រឹមតែប៉ុណ្ណោះ ឯកឧត្តមក៏បានគណនានូវថ្លៃដើមផលិតជូនប្រជាកសិករ ឱ្យបានយល់កាន់តែច្បាស់ ពីប្រសិទ្ធភាពសេដ្ឋកិច្ច សំដៅកាត់បន្ថយថ្លៃដើម   ផលិតក្នុងផលិតកម្មដំណាំស្រូវ។

បន្ថែមពីនេះ ឯកឧត្ដមអនុរដ្ឋលេខាធិការ បានជម្រាបជូនប្រជាកសិករពីគោលនយោបាយរាជរដ្ឋាភិបាលក្នុងការជួយឧបត្ថម្ភ និងគាំទ្រប្រជាកសិករកម្ពុជា ស្របតាមប្រសាសន៍ដ៏ថ្លៃថ្លា និងខ្ពង់ខ្ពស់របស់សម្ដេចមហាបវរ    ធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលថ្លែងចេញពីស្រុកភ្នំក្រវាញ ខេត្តពោធិសាត់ នៅថ្ងៃទី២០ ខែមករា ឆ្នាំ២០២៥ បញ្ជាក់ពីការកាត់បន្ថយថ្លៃដើមនៃការផលិត តាមរយៈការមិនយកពន្ធលើដី   កសិកម្ម  ការមិនយកពន្ធអាករលើឧបករណ៍សម្ភារៈកសិកម្ម វត្ថុធាតុដើម ពូជដំណាំ និងជី ហើយបន្តគិតគូរពីបញ្ហាទឹកជូនប្រជាកសិករ កសាងផ្លូវ ថ្លៃអគ្គិសនី ប្រឡាយទឹក ហេដ្ឋារចនាសម្ព័ន្ធចាំបាច់ ដើម្បីលើកស្ទួយជីវភាពប្រជាពលរដ្ឋជាដើម។

ទន្ទឹមនឹងនេះ ឯកឧត្តមអនុរដ្ឋលេខាធិការ ក៏បានជម្រាបជូនយ៉ាងពិស្តារអំពីគោលការណ៍ អត្ថប្រយោជន៍នៃសហគមន៍កសិកម្មទំនើប ដែលជាយន្តការប្រកបដោយប្រសិទ្ធភាព និងប្រសិទ្ធផល ក្នុងការដោះស្រាយបញ្ហាប្រឈម និងកង្វល់របស់ប្រជាកសិករជារួម។ ជាមួយគ្នានោះ ប្រជាកសិករបានយល់ច្បាស់ និងសំដែងនូវសេចក្ដីរីករាយ ជាមួយចេតនាចូលរួម ក្នុងសហគមន៍កសិកម្មទំនើបផងដែរ។ ក្នុងឱកាសនោះ ឯកឧត្ដមអនុរដ្ឋលេខាធិការ ក៏បានជំរុញឱ្យមន្ត្រីកសិកម្មឃុំ អាជ្ញាធរភូមិ ឃុំ និងមន្ត្រីមន្ទីរកសិកម្មខេត្ត  ជួយប្រជាកសិករក្នុងការបង្កើតជាសហគមន៍កសិកម្មទំនើបឱ្យបានឆាប់ៗនាពេលខាងមុខនេះ។

ជាទីបញ្ចប់ ឯកឧត្តមអនុរដ្ឋលេខាធិការ និងក្រុមការងារ បានបន្តដំណើរចុះត្រួតពិនិត្យ និងលើកទឹកចិត្តដល់រោងម៉ាស៊ីនកិនស្រូវ សាន ទី ស្ថិតនៅភូមិរហាល ឃុំរហាល ស្រុកព្រះនេត្រព្រះ បន្តជួយអន្តរាគមន៍ទិញស្រូវពីប្រជាកសិករ៕