ឯកឧត្តមអនុរដ្ឋលេខាធិការ គី ច័ន្ទរំដួល អញ្ជើញចុះពិនិត្យវឌ្ឍនភាព និងកិច្ចអន្តរាគមន៍វិស័យកសិកម្ម ក្នុងខេត្តប៉ៃលិន

ចេញ​ផ្សាយ​ ១ កុម្ភៈ ២០២៥ 3383

នៅថ្ងៃទី៣១ ខែមករា ឆ្នាំ២០២៥ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោក សាយ សុផាត ប្រធានមន្ទីរកសិកម្ម រុក្ខាប្រមាញ់ និងនេសាទខេត្តប៉ៃលិន លោក សុខ សាធីម ប្រធានមន្ទីរពាណិជ្ជកម្មខេត្ត និង លោក ស ប៊ុនធឿន អនុប្រធានមន្ទីរធនធានទឹក និងឧតុនិយមខេត្តប៉ៃលិន បានអញ្ជើញចុះពិគ្រោះជាមួយវិស័យឯកជន និងកិច្ចអន្តរាគមន៍ ក្នុងវិស័យកសិកម្ម នៅខេត្តប៉ៃលិន។

ឯកឧត្តមអនុរដ្ឋលេខាធិការ បានគូសបញ្ជាក់ថា ការចុះពិគ្រោះជាមួយវិស័យឯកជន និងកិច្ចអន្តរាគមន៍ក្នុងវិស័យកសិកម្មមានចំនួន ០៤កម្មវិធី រួមមាន ការជួបសំណេះសំណាលជាមួយក្រុមហ៊ុន​ សុី.ភី​.​ ខេមបូឌា​ ចំកាត់ ជាក្រុមហ៊ុនប្រមូលទិញកសិផលក្នុងខេត្តប៉ៃលិន។ ក្រុមហ៊ុនសុី.ភី​. ទទួលទិញកសិផលដូចជា ពោតក្រហម និងដំឡូងមី ចន្លោះចំនួន៦០០តោន ទៅ៨៥០តោនក្នុងមួយថ្ងៃ សម្រាប់ផ្គត់ផ្គង់ទីផ្សារខេត្តកំពត រាជធានីភ្នំពេញ និងប្រើប្រាស់ផ្ទាល់ក្នុងក្រុមហ៊ុន។ ទន្ទឹមនឹងនេះ ក្រុមហ៊ុនបានស្នើសុំដល់សៃឡូ និងម្ចាស់ចម្ការផលិតឱ្យស្របតាមស្តង់ដារ និងគុណភាព ដែលក្រុមហ៊ុនបានជូនដំណឹង ដោយសារក្រុមហ៊ុនទទួលទិញកសិផលទាំងអស់ ដែលមិនប៉ះពាល់ដល់បរិស្ថាន ជីវ:ចម្រុះ និងពលកម្មកុមារជាដើម។

ដោយឡែកកម្មវិធីបន្ទាប់ ឯកឧត្តមអនុរដ្ឋលេខាធិការ បានបន្តជួបសំណេះសំណាលជាមួយកសិករ និងពិនិត្យលទ្ធភាពបូមទឹកសង្រ្គោះស្រូវរដូវប្រាំងឆ្នាំ២០២៥ តាមរយៈកិច្ចសហការជាមួយមន្ទីរធនធានទឹក និងឧតុនិយម ជួយសម្របសម្រួលជាមួយម្ចាស់រោងម៉ាស៊ីនកិនស្រូវ និងអ្នកប្រមូលទិញស្រូវ ស្ថិតនៅភូមិភ្នំកុយ ឃុំសាលាក្រៅ ស្រុកសាលាក្រៅ​ ខេត្តប៉ៃលិន។

កម្មវិធីចុងបញ្ចប់ ឯកឧត្តមអនុរដ្ឋលេខាធិការ បានស្នើសុំពិនិត្យ និងពិគ្រោះយោបល់ជាមួយលោក ហ៊ាង លីវ ម្ចាស់ឃ្លាំងប្រមូលទិញកសិផលឯកជន ពោត និងដំឡូងមី​ នៅភូមិវាល ឃុំសាលាក្រៅ ស្រុកសាលាក្រៅ ខេត្តប៉ៃលិន៕