ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម អញ្ជើញដឹកនាំគណៈប្រតិភូក្រសួងកសិកម្ម ដាក់កម្រងផ្កាគោរពវិញ្ញាណ​ក្ខន្ធ​​វីរយុវជន វីរយុវនារី នៅមហាចេតិយតំបន់ប្រវត្តិសាស្ត្រ យោធាតេជោកោះថ្ម X16 ខេត្តត្បូងឃ្មុំ

ចេញ​ផ្សាយ​ ១៧ មិថុនា ២០២៤ 4068

នៅព្រឹកថ្ងៃសៅរ៍ ទី១៥ ខែមិថុនា ឆ្នាំ២០២៤ ឯកឧត្តម ឱម គឹមស៊ា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាង​ឯកឧត្តមរដ្ឋមន្រ្តី ឌិត ទីណា បានអញ្ជើញដឹកនាំគណៈប្រតិភូ​ក្រសួងកសិកម្ម រុក្ខាប្រមាញ់ និងនេសាទ ដាក់កម្រងផ្កាគោរពវិញ្ញាណក្ខន្ធ​វីរយុវជន វីរយុវនារី និងបុព្វបុរសដែលបានពលីជីវិតដើម្បីរំដោះ​ប្រទេសជាតិ និងសង្គ្រោះអាយុជីវិតប្រជាជនកម្ពុជា នៅមហាចេតិយ​តំបន់​​​ប្រវត្តិសាស្ត្រ យោធាតេជោកោះថ្ម X16 ស្ថិតនៅក្នុង ឃុំទន្លូង ស្រុកមេមត់ ខេត្តត្បូងឃ្មុំ។

តាមសេចក្តីជូនដំណឹង របស់គណៈកម្មការអន្តរក្រសួង ដើម្បីរៀបចំពិធី​រំលឹកខួបលើកទី៤៧  នៃទិវាចងចាំដំណើរឆ្ពោះទៅការ​ផ្តួល​រំលំរបប​ប្រល័យពូជសាសន៍ប៉ុលពត ២០ មិថុនា ១៩៧៧-២០ មិថុនា ២០២៤ នឹងអនុញ្ញាត្តឱ្យមានការចូលរួមដាក់កម្រងផ្កា គ្រប់ក្រសួង ស្ថាប័ន វិស័យឯកជន​ និងសាធារណជន ដែលប្រព្រឹត្តទៅចាប់ពីថ្ងៃទី១១ ដល់ថ្ងៃទី១៦ ខែមិថុនា  ឆ្នាំ២០២៤។

សូមបញ្ជាក់ថា នៅថ្ងៃទី២០ ខែមិថុនា ឆ្នាំ២០២៤ ពិធីរៀបចំទិវារំលឹកខួបលើកទី៤៧នេះ នឹងប្រព្រឹត្តទៅ​ក្រោម​​អធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃ​​ព្រះរាជាណាចក្រកម្ពុជា ប្រារព្វធ្វើឡើង​នៅមហាចេតិយ​តំបន់ប្រវត្តិសាស្ត្រ យោធាតេជោកោះថ្ម X16 ស្ថិតនៅក្នុង ឃុំទន្លូង ស្រុកមេមត់ ខេត្តត្បូងឃ្មុំ៕