ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ អញ្ជើញដឹកនាំគណៈប្រតិភូក្រសួង ដើម្បីចូលរួមកិច្ចប្រជុំពិភាក្សាលើសំណើគម្រោងអនុវត្តក្នុងក្របខ័ណ្ឌច្រករបៀងមច្ឆា និងអង្ករ នៅទីក្រុងប៉េកាំង សាធារណរដ្ឋប្រជាមានិតចិន
ចេញផ្សាយ ២២ មីនា ២០២៥ 2220
នារសៀលថ្ងៃទី១៨ ខែមីនា ឆ្នាំ២០២៥ នៅទីស្តីការក្រសួងកសិកម្ម និងកិច្ចការជនបទនៃសាធារណរដ្ឋប្រជាមានិតចិន ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំ គណៈប្រតិភូក្រសួងកសិកម្ម ចូលរួមប្រជុំពិភាក្សាលើសំណើគម្រោងអនុវត្តក្នុងក្របខ័ណ្ឌច្រករបៀងមច្ឆា និងអង្ករ ជាមួយ លោក Jin Ke អគ្គនាយកនៃមជ្ឈមណ្ឌលកិច្ចសហប្រតិបត្តិការសេដ្ឋកិច្ចអន្តរជាតិ (FECC) និងតំណាងពីស្ថាប័ន និងសហគ្រាសពាក់ព័ន្ធរបស់ភាគីចិន។
នៅក្នុងកិច្ចប្រជុំនេះ ភាគីទាំងពីរបានពិនិត្យ និងពិភាក្សាលើបញ្ជីគម្រោងអាទិភាពដែលភាគីទាំងពីរមានបំណងអនុវត្តក្នុងក្របខ័ណ្ឌច្រករបៀងមច្ឆា និងអង្ករ ដែលក្នុងនោះរួមមាន គម្រោងវិនិយោគ គម្រោងកិច្ចសហការជំនួយបច្ចេកទេស និងគម្រោងកសាងសមត្ថភាព។
នាឱកាសនោះ ឯកឧត្តមរដ្ឋលេខាធិការ បានថ្លែងអំណរគុណដល់ភាគីចិនដែលបានចូលរួមកិច្ចសហប្រតិបត្តិការច្រករបៀងមច្ឆា និងអង្គរ ហើយឯកឧត្តមក៏បានលើកសំណើទៅភាគីចិន ដើម្បីបន្ថែមនូវគម្រោងសំខាន់ៗពាក់ព័ន្ធនឹងការកែច្នៃកសិផលមួយចំនួន ដូចជា កៅស៊ូ ស្វាយចន្ទី និងស្វាយ ជាដើម ព្រមទាំងស្នើសុំបង្កើននូវការវិនិយោគ ដោយផ្តោតលើការផលិតចំណីសត្វ និងផលិតវ៉ាក់សាំងសម្រាប់សត្វផងដែរ។
ជាការឆ្លើយតប ភាគីចិនបានទទួលយកសំណើរបស់ភាគីកម្ពុជា ដោយសន្យាថា នឹងព្យាយាមកៀរគរវិនិយោគិនចិនមកពិនិត្យលើកាលានុវត្តភាពក្នុងវិស័យកសិកម្មសំខាន់ៗរបស់កម្ពុជា៕
