ព័ត៌មានផ្សេងៗទៀត
ក្រសួងកសិកម្ម បើកវគ្គបណ្តុះបណ្តាលស្តីពីការប្រមូល និងធានាគុណភាពទិន្នន័យកសិកម្ម ដោយប្រើប្រាស់បច្ចេកវិទ្យាឌីជីថល
ចេញផ្សាយ ២៨ ឧសភា ២០២៦ 382
ឯកឧត្តមបណ្ឌិត យ៉ង សាំងកុមារ និង ឯកឧត្តម កែវ អូម៉ាលីស្ស រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីបើកវគ្គបណ្ដុះបណ្ដាលស្តីពី «ការប្រមូល និងធានាគុណភាពទិន្នន័យកសិកម្ម» នៅខេត្តកំពត ដែលប្រព្រឹត្តទៅចាប់ពីថ្ងៃទី២៦ ដល់២៨ ខែឧសភា ឆ្នាំ២០២៦។
វគ្គបណ្តុះបណ្តាលនេះ មានការចូលរួមពីឯកឧត្តមអនុរដ្ឋលេខាធិការ ថ្នាក់ដឹកនាំ និងមន្រ្តីរាជការមកពីនាយកដ្ឋានសំខាន់ៗចំនួន៣ រួមមាន៖ នាយកដ្ឋានផ្សព្វផ្សាយកសិកម្ម នាយកដ្ឋានបរិវត្តកម្មឌីជីថល និងនាយកដ្ឋានផែនការ និងស្ថិតិ។
ឯកឧត្តមបណ្ឌិត យ៉ង សាំងកុមារ បានគូសបញ្ជាក់ថា វគ្គបណ្ដុះបណ្ដាលនេះរៀបចំឡើងក្នុងគោលបំណងសំខាន់ៗចំនួន ៤៖
១. អភិវឌ្ឍសមត្ថភាពក្រុមការងារថ្នាក់ជាតិឱ្យកាន់តែយល់ច្បាស់ពីការប្រើប្រាស់ CAOs Farmbook App
២. ធានាបាននូវការគ្រប់គ្រង Admin Dashboard ប្រកបដោយប្រសិទ្ធភាព
៣. ស្វែងយល់ពីរបៀបបង្កើតផ្ទាំង និងគ្រប់គ្រងទិន្នន័យ ដោយប្រើប្រាស់កម្មវិធី Power BI
៤. បង្កើតប្រព័ន្ធទំនាក់ទំនង និងវិធានការធានាគុណភាព សម្រាប់ការប្រមូលទិន្នន័យឱ្យមានប្រសិទ្ធភាពខ្ពស់។
ក្នុងឱកាសនោះដែរ ឯកឧត្តមបណ្ឌិត បានផ្តល់អនុសាសន៍ណែនាំឱ្យនាយកដ្ឋានទាំង៣ ត្រូវបង្កើនកិច្ចសហការគ្នាឱ្យបានស្អិតរមួត ក្នុងកិច្ចការប្រមូល និងគ្រប់គ្រង់ទិន្នន័យវិស័យកសិកម្ម ប្រកបដោយសុក្រឹតភាព គុណភាព និងគ្រប់ជ្រុងជ្រោយ ដើម្បីធ្វើជាមូលដ្ឋានគ្រឹះដ៏រឹងមាំក្នុងការរៀបចំផែនការគោលនយោបាយអភិវឌ្ឍវិស័យកសិកម្មជាតិ៕
