ថ្នាក់ដឹកនាំក្រសួងកសិកម្ម ដឹកនាំប្រជុំវឌ្ឍនភាពនៃការវាយតម្លៃ និងជ្រើសរើសអ្នកទទួលផលពី«គម្រោង EMPOWER» នៅក្រុង​សិរីសោភ័ណ ខេត្តបន្ទាយមានជ័យ

ចេញ​ផ្សាយ​ ១ សីហា ២០២៦ 3107

នៅថ្ងៃទី៣១ ខែកក្កដា ឆ្នាំ២០២៦ ឯកឧត្តម ស្រី វុឌ្ឍី អនុរដ្ឋ​លេខា​ធិការ នៃក្រសួងកសិកម្ម រុក្ខាប្រមាញ់ និងនេសាទ និងជា​ប្រធាន​អនុវត្តគម្រោងលើកកម្ពស់ជីវភាពប្រកបដោយ​ប្រសិទ្ធ​ភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹង​ភាពធន់ (EMPOWER) ប្រចាំក្រុងសិរីសោភ័ណ បានអញ្ជើញ​ដឹកនាំកិច្ចប្រជុំពិភាក្សាអំពីវឌ្ឍនភាពនៃការវាយតម្លៃ និងការ​អនុវត្ត​គម្រោង( EMPOWER) នៅមន្ទីរកសិកម្ម ខេត្តបន្ទាយ​មានជ័យ។
កិច្ចប្រជុំមានការចូលរួមពី លោកស្រី អន ស៊ីថា ប្រធានស្តីទីមន្ទីរ​កសិកម្ម រុក្ខាប្រមាញ់ និងនេសាទ និងជាប្រធានអនុវត្តគម្រោង​ថ្នាក់ខេត្ត លោក អ៊ឹម សុភារៈ អភិបាលរង នៃគណៈអភិបាល​ក្រុង​សិរីសោភ័ណ ព្រមទាំងអ្នកសម្របសម្រួលគម្រោង មន្ត្រីជំនាញ​មក​ពី​ការិយាល័យក្សេត្រសាស្ត្រ និងផលិតភាពកសិកម្ម ការិយា​ល័យ​ផលិតកម្ម និងបសុព្យាបាល ក្រុមប្រឹក្សាសង្កាត់ ចៅសង្កាត់ មន្ត្រីកសិកម្មសង្កាត់ និងអាជ្ញាធរភូមិមកពីសង្កាត់គោលដៅ​ចំនួន៣ គឺសង្កាត់កំពង់ស្វាយ សង្កាត់ភ្នៀត និងសង្កាត់ម្កាក់។
កិច្ចប្រជុំនេះត្រូវបានរៀបចំឡើងក្នុងគោលបំណងចម្បងៗរួមមាន ៖ ត្រួតពិនិត្យវឌ្ឍនភាពការងារ តាមដាន និងវាយតម្លៃ​ឡើងវិញលើដំណើរការជ្រើសរើសប្រជាពលរដ្ឋជាអ្នកទទួលផលពីគម្រោង ជំរុញការប្រមូលព័ត៌មានបន្ថែម និងបង្កើនសន្ទុះនៃការ​ជ្រើសរើសអ្នកទទួលផលឱ្យបានអស់លទ្ធភាព ប្រកបដោយ​តម្លាភាព និងចំក្រុមគោលដៅដែលងាយរងគ្រោះពិតប្រាកដ។ ផ្តល់ការណែនាំ និងតម្រង់ទិសយ៉ាងច្បាស់លាស់ដល់ភាគី​ពាក់ព័ន្ធ​ទាំងអស់ ដើម្បីបង្កើនប្រសិទ្ធភាពនៃការចូលរួមសហការ និងការអនុវត្តសកម្មភាពផ្ទាល់នៅមូលដ្ឋាន។ ពិនិត្យមើលបញ្ហា​នានា​ដែលបានជួបប្រទះក្នុងពេលអនុវត្ត ដើម្បីដាក់ចេញនូវវិធាន​ការដោះស្រាយ ឱ្យបានទាន់ពេលវេលា។
ក្នុងឱកាសនោះ ឯកឧត្តម ស្រី វុឌ្ឍី បានផ្តល់អនុសាសន៍ និងការ​ណែនាំបន្ថែមដល់អ្នកពាក់ព័ន្ធ ក៏ដូចជាមន្ត្រីជំនាញទាំងអស់ ឱ្យបន្តយកចិត្តទុកដាក់ខ្ពស់ និងសហការគ្នាយ៉ាងជិតស្និទ្ធ ដើម្បី​ធានាថា គម្រោង(EMPOWER) នេះ នឹងជួយលើកកម្ពស់​ជីវភាព និងពង្រឹងភាពធន់ផ្នែកសេដ្ឋកិច្ចរបស់ប្រជាកសិករ ក្នុង​ក្រុងសិរីសោភ័ណឱ្យកាន់តែមានចីរភាព និងទទួលបាន​លទ្ធផល​ជាផ្លែផ្កាតាមការរំពឹងទុក៕